Jumystyń ońaıy joq. Bul – ómirdiń ózi dáleldegen aqıqat. Alaıda, ár jumystyń ózindik qıyndyǵy bar. Sondaı qyzyǵynan góri qıyndyǵy basym jumystyń biri – kenshilik. Qıyndyǵy, jer astynda jumys isteý ekiniń biriniń qolynan kele bermeıdi. Bul jerde eńbek etý úshin eń áýeli temirdeı tózim qajet. Qyzyǵy, qatarlas qurbylaryńmen birge el ıgiligin eseleýge úles qosasyń.
Jumystyń ońaıy joq. Bul – ómirdiń ózi dáleldegen aqıqat. Alaıda, ár jumystyń ózindik qıyndyǵy bar. Sondaı qyzyǵynan góri qıyndyǵy basym jumystyń biri – kenshilik. Qıyndyǵy, jer astynda jumys isteý ekiniń biriniń qolynan kele bermeıdi. Bul jerde eńbek etý úshin eń áýeli temirdeı tózim qajet. Qyzyǵy, qatarlas qurbylaryńmen birge el ıgiligin eseleýge úles qosasyń.
Kezinde Elbasymyz eńbek jolyn bastaǵan taý-ken salasynda búginde abyroımen qyzmet atqaryp, el ıgiligi jolynda aıanbaı ter tógip júrgen qazaq jastary da az emes. Sondaı jalyndy jastyń biri – Erlat Moldahanov. Erlat búginde «Qazaqmys» kompanııasyna qarasty Ertis kenishinde ýchaske bastyǵy qyzmetin atqaryp júr.
Kúrshim aýdanynyń Qaratoǵaı aýylynda dúnıege kelgen Erlat qazirgi ýaqytta ken ıgerý isiniń kánigi mamany bolǵanyn aıtady.
– Bul jerde 2006 jyldan beri eńbek etip kelemin. Árıne, eń alǵash jumysqa ornalasqan kezimde ońaı bolǵan joq. Biraz qınalǵanym da ras. Alaıda, janymdaǵy áriptesterim jańadan keldiń dep jatsynbaı bilgenderin aıtyp, bilmegenimdi kórsetip, durys baǵyt-baǵdar nusqap, kenshiliktiń qyr-syryn úıretti. Ol kisilerge aıtar alǵysym sheksiz, – deıdi Erlat.
Kenshi bolý aýylda týyp-ósken qara sıraq qazaq balasynyń óńi túgili túsine de kirmegeni ras. Alaıda, mundaı jumysty buryn-sońdy atqaryp kórmese de eńbekqor jas jańa jumysyna birden beıimdelip, urshyqsha ıirip áketedi. Muny baıqaǵan basshylyq Erlatty 2009 jyly ken ıgerý sheberi (master) qyzmetine taǵaıyndaıdy. Qazirgi ýaqytta jalyndy jas ýchaske bastyǵy qyzmetin jaýapkershilikpen atqaryp júr.
– Alty kún jumys istep, bir kún demalamyz. Jumys ýaqytymyz ónim óndirýdiń kólemine de baılanysty. Negizinen tehnıkamen jumys isteımiz, rýdany vagondarga tıeımiz. Qyzmetkerlerge ózim baǵyt-baǵdar kórsetip otyramyn. Mundaǵy jumystyń deni tehnıka kúshimen júzege asady. Qol jumysy ájeptáýir jeńildedi deýge bolady. Qazirgi ýaqytta basshylyq tehnıkamen jabdyqtaý jaǵyna erekshe mán berýde. Alatyn jalaqymyz da jaman emes. Jalaqy kólemi jospardyń oryndalýyna baılanysty. Jospardy asyra oryndasaq, syıaqy alamyz. Sondyqtan qaı kezde de aıanbaı jumys isteýge talpynamyz, – deıdi Erlat.
Erlattyń aıtýynsha, munda eńbek qaýipsizdigine, qyzmetkerlerdiń jaıly jumys isteýine erekshe kóńil bólinedi. Sebebi, qaýipsizdik tabysty jumystyń kepili.
Erlat jetekshilik etetin ýchaskede alty brıgada bar. Ár brıgadada on toǵyz adamnan. Qysqasy, Erlat jas bolsa da qol astyndaǵy 80-90 adamdy ortaq jumysqa jumyldyryp, ujymda bedeli artyp keledi.
– Ujymdaǵy qyzmetkerlerdiń barlyǵy óte uıymshyl. Árdaıym bir jeńnen qol, bir jaǵadan bas shyǵaryp, jumystyń nátıjeli bolýy jolynda eshqaısysy aıanyp qalǵan emes. Árqaısysy bir birine aıryqsha qurmetpen qaraıdy. Qazirgi ýaqytta ájeptáýir tájirıbe jınaqtap, jumystyń qyr-syryna qanyǵyp qaldym. Munda jumysqa kelgenime esh ókinbeımin, – deıdi Erlat Moldahanov.
«Áke kórgen oq jonar, sheshe kórgen ton pisher» demekshi, Erlattyń bul jumysqa kelýine ákesi sebepshi bolypty. Ákesi Bolathan úsh jyldaı kyzmet istegen kórinedi. Búginde eńbekqor Erlat áke jolyn abyroımen jalǵastyryp, ken ıgerýdiń naǵyz mamanyna aınaldy...
Azamat Ábiluly.
О́SKEMEN.
Sýrette: Erlat MOLDAHANOV ozat kenshiler brıgadasymen.
