Keshe «QazMunaıGaz» UK» AQ-tyń bas ǵımaratynda «Samuryq-Qazyna» AQ basqarýshy dırektory Darhan Qaletaev pen qor janyndaǵy Áleýmettik áriptestik ortalyǵynyń bas dırektory Nurlan Erimbetovtiń basshylyǵymen baspasóz konferensııasy boldy.
Keshe «QazMunaıGaz» UK» AQ-tyń bas ǵımaratynda «Samuryq-Qazyna» AQ basqarýshy dırektory Darhan Qaletaev pen qor janyndaǵy Áleýmettik áriptestik ortalyǵynyń bas dırektory Nurlan Erimbetovtiń basshylyǵymen baspasóz konferensııasy boldy.
Sharanyń taqyryby «Samuryq-Qazyna» AQ toby kompanııalarynyń áleýmettik turaqtylyq reıtıngi» dep ataldy. Birinshi sóz alyp, taqyryptyń mán-mańyzyna toqtalǵan D.Qaletaev qor tobyndaǵy kompanııalardyń áleýmettik qyzmetin taratty. Sóıtip, qor janynda qurylǵan Áleýmettik áriptestik ortalyǵynyń bas dırektoryna sóz kezegin berdi. N.Erimbetov ortalyqtyń osy ýaqytqa deıin atqarǵan jumystarymen BAQ ókilderin jan-jaqty tanystyrdy.
Bas dırektordyń dáıekti málimetterine kóz salsaq, ortalyq aıtarlyqtaı is tyndyrǵan. Qysqa ýaqyttyń ishinde ár kompanııalarda áleýmettik saýalnamalar júrgizip, jumysshylardyń hal-jaǵdaıy men kóńil-kúıin, sondaı-aq, jumysqa degen yntalarynyń reıtıngin anyqtap, sol boıynsha arnaıy áleýmettik karta da jasap jatyr eken. Nátıjesinde, kóptegen áleýmettik máselelerdiń túıini tabylyp, týyndaǵan saldary anyqtalǵan. Oǵan qosa, endigi saldardyń ákeler zardaby men zalaly da kartada aıqyn kórsetilgen.
Kartadaǵy reıtıngterdi qor tobyndaǵy eki ulttyq kompanııa basshylyǵyna kórsetkenimizde olar tań-tamasha qalyp, óz qatelik, kemshilikterin áreń moıyndady. Olaı etpeske amaldary da joq edi. О́ıtkeni, bul jumystardyń bári ǵylymı turǵyda zerttelip, zerdelengen dúnıeler, dedi ortalyqtyń bas dırektory N.Erimbetov UÁQ janynan ortalyqtyń qurylýyna 2011 jyly jeltoqsanda Jańaózende oryn alǵan oqıǵa sebep bolǵanyn ashyq aıtty. Sóıtip, budan bylaı qor tobyndaǵy kompanııalarda áleýmettik jaǵdaılardy baqylap, eńbek daýlary men túrli túsinispeýshilikterdiń aldyn alyp otyrý basty maqsattyń birine aınalǵanyn negizdedi. Ortalyq júrgizip otyrǵan osy ǵylymı is-sharalar negizinde qor tobyndaǵy kompanııalardyń áleýmettik kartasy túzilip, ár kompanııanyń áleýmettik saıasatyn jetildirýge usynystar da daıyndap jatqan kórinedi. Atqarylyp jatqan osy zertteý jumystary aldaǵy ýaqytta bolýy yqtımal eńbekke baılanysty qaqtyǵystardyń aldyn alýǵa, olardy tez arada anyqtap, sheshimin jedel tabýǵa kómek beredi.
Konferensııada ortalyqtyń jumysshy-qyzmetkerlerge kómekshi qural retinde daıyndaǵan «Meniń saýalym bar...» atty anyqtamalyq kitaby da tanystyryldy. Kitaptyń aty aıtyp turǵandaı, kez kelgen jumysshy izdegen qandaı da quqyqtyq saýalyna anyqtamalyqtan qysqa da nusqa ári uǵynyqty jaýabyn ala alady.
Shara sońy saýal-jaýapqa ulasty. Tilshiler tarapynan qoıylǵan birqatar suraqtarǵa jaýap bergen bas dırektor ulttyq máseleler men memlekettik tilge de aıryqsha toqtalyp ótti. Baspasóz konferensııasyn qorytyndylaǵan D.Qaletaev búgingi tańda «Samuryq-Qazyna» AQ memlekettik tildi óndiriske tolyq engizý boıynsha arnaıy baǵdarlama daıyndap jatqanyn aıtty.
Nurbaı ELMURATOV,
«Egemen Qazaqstan».
