Qomaqty qarjy epıdemııaǵa qarsy is-sharalarǵa qatysqan dárigerler men medısına qyzmetkerlerine ústeme aqy tóleýge, ókpege jasandy túrde dem jiberetin apparattardy, dezınfeksııalaý quraldary men medısınalyq maska satyp alýǵa jumsalady.
- Bul qarjy, negizinen, oblystyń medısınalyq mekemelerin materıaldyq-tehnıkalyq qamtamasyz etýdi kúsheıtýge jumsalady. Oblysqa ókpege jasandy túrde dem jiberetin 41 apparat jetkiziledi. Mundaı qurylǵylar qazir ózimizde de bar. Biraq sozylmaly dertke ushyraǵan, ásirese, egde jastaǵy adamdardyń ókpesi istemeı qalatyny belgili. Sondyqtan biz qosymsha qurylǵylardy satyp satyp alyp otyrmyz. Onyń 11-i taıaýda keledi, 30-y 15-20 sáýirge qaraı jetkiziledi, - dedi A. Muhambetov.
Oblys basshysy indetke qarsy sharalarǵa tartylatyn dárigerlerge tólenetin ústeme aqy máselesiniń de basyn asha ketti. Ákimniń aıtýynsha, táýlik boıy jumys istep jatqan dárigerler men medısına qyzmetkerlerine qazirshe 241 mln teńge bólinip otyr.
Jıynda densaýlyq saqtaý basqarmasynyń basshysy Vıacheslav Dýdnık búginge deıin Qostanaı oblysynda koronavırýs ınfeksııasyn juqtyrý jaǵdaılary tirkelmegenin, indettiń aldyn alý sharalary kúsheıtilgen tártipte júrgizilip jatqanyn atap ótti.
Taýarlar men qyzmetterdiń sapasyn baqylaý departamentiniń basshysy Oral Bekmaǵambetovtiń málimdeýinshe, oblys aýmaǵyndaǵy memlekettik shekarada 8 ótkizý pýnkti bar, 2 temirjol jabyq, qalǵan beketter qatań rejimde jumys istep jatyr.
Departament áleýmettik-turmystyq maqsattaǵy 1064 nysandy baqylaýǵa alyp, monıtorıng júrgizgen. Nátıjesinde 33 iri saýda ortalyǵynyń jumys ýaqyty shektelip, 105 nysannyń qyzmeti toqtatylǵan. Onyń ishinde 21 saýda ortalyǵy, 23 oıyn-saýyq kesheni, 10 kınoteatr, 15 fıtnes-ortalyq, 4 túngi klýb jáne 32 qoǵamdyq mekeme bar.
Sonymen qatar, 21 HQKO, 35 bank, 44 dinı mekemede dezınfeksııalyq rejimd kúsheıtildi.
Qostanaı oblysy
