Bizge berilgen málimet boıynsha, tártip saqshylary osyndaı maqsatqa maldanǵan bes adamdy qolǵa túsirdi. Ustalǵandar azamattardy aqshasyn tólegen jaǵdaıda ótkizý beketinen aınalyp ótip, qalaǵa alyp kirýge ýáde bergen.
– Olar óz qyzmetiniń aqysyn ár adamǵa 3 myńnan 5 myń teńgege deıin baǵalaǵan. Er adamdar ustaldy jáne QR Ákimshilik quqyq buzýshylyq týraly kodeksiniń 476-baby «Tótenshe jaǵdaıdy buzý» boıynsha qylmystyq jaýapkershilikke tartyldy. Almaty qalasynyń mamandandyrylǵan aýdanaralyq ákimshilik sotynyń sheshimimen, atalǵan adamdarǵa aıyppul salyndy. Ondaı áreketterdiń paıdasyz ekenin jáne esh nátıje bermeıtinin atap ótkim keledi. Tótenshe jaǵdaı kezinde ońaı aqsha tapqysy keletinderge jaýapkershilikti umytpaý týraly eskertemin. Mundaı áreketterdiń joly birden kesiledi», – dedi Naýryzbaı aýdandyq Polısııa basqarmasynyń basshysy Dıdar Ahanov.
Este bolsa, kúni keshe qala qaqpasyna qoıylǵan blok-beketten 2 myń teńgege ótkizbek bolǵan qyzmetkerdiń áreketi áshkerelenip, jaýapkershilikke tartylǵan edi. Osyǵan baılanysty Almaty polısııa departamenti azamattardy zańǵa baǵynýǵa jáne kedergilerden ótýdiń zańsyz joldaryn izdemeýge shaqyrady.
