Ulttyq kásipkerler palatasy 16 naýryzda arnaıy jedel shtab qurdy. Oǵan 3 kún ishinde 6 myńǵa jýyq ótinish túsken. Eldegi jaǵdaıǵa baılanysty kompanııalar jumysshylaryn qysqartýǵa májbúr. Kásipkerler shıkizattyń jetispeýshiliginen ári kúrt qymbattaýynan zardap shegip otyr. Soǵan oraı Úkimetten ǵımarat jáne jer jaldaý aqysyn tóleý merzimin uzartýdy, salyqtan ýaqytsha bosatýdy suraıdy.
– Bul qıyndyqtardyń deni shekaranyń jabylýy men arnaıy qaýipsizdik sharalaryn engizý saldarynan týyndap otyr. Jalpy ótinish jibergen kompanııalardyń 85 paıyzy – shaǵyn bıznes, 13 paıyzy – orta bıznes, 2 paıyzy – iri bıznes ókilderi. О́tinish jasaǵan kompanııalardyń jartysy Nur-Sultan men Almaty qalalaryna tıesili, – deıdi N.Bókeıhanov.
Kásipkerlerdiń 60 paıyzy qarjylaı qıyndyqqa tap bolǵan. Sondyqtan kásiporyndar eńbek resýrstaryn saqtaýǵa ótemaqy berýdi surap otyr.
– Aıtylǵan usynystar memlekettik organdarǵa jiberildi. Olarmen arnaıy sharalar júrgizilip jatyr. Eń birinshi qoldanylatyn shara – kásipkerlerdi salyqtan bosatý. Aldaǵy jańalyqtardy kásipkerler atameken.kz portalynan bile alady, – dedi Sh.Temir. Onyń aıtýynsha, keıbir bankte tutynýshylaryna jeńildikter jasaǵan. Olardyń nesıe boıynsha mindettemelerin 90 kúnge keıin shegeripti. Búginde bul jumystardy basqa da bankter qolǵa alýda.
Aıta keteıik, «Atameken» Ulttyq kásipkerler palatasy tolyqtaı onlaın rejimge kóshti. Soǵan saı kásipkerlerge arnaıy call-sentr uıymdastyrǵan. Kez kelgen kásipker 1432 nómirine habarlasyp, kókeıdegi suraqtaryna jaýap ala alady.
