Keshe Memleket basshysy Nursultan Nazarbaev 2014-2016 jyldarǵa arnalǵan respýblıkalyq bıýdjet jobasyn qalyptastyrý máselesi jóninde keńes ótkizdi, dep habarlady Prezıdenttiń baspasóz qyzmeti.
Keshe Memleket basshysy Nursultan Nazarbaev 2014-2016 jyldarǵa arnalǵan respýblıkalyq bıýdjet jobasyn qalyptastyrý máselesi jóninde keńes ótkizdi, dep habarlady Prezıdenttiń baspasóz qyzmeti.
Memleket basshysy bıýdjetti qalyptastyrý el aldynda turǵan, sonyń ishinde «Qazaqstan-2050» Strategııasynda kórsetilgen maqsattarǵa qol jetkizýge baǵyttalǵanyn atap ótti.
– Memlekettik qarajatty tıimdi paıdalanyp, bıýdjet túsimderiniń kózderin jyl saıyn ulǵaıtyp otyrý qajet. Kórsetilgen ólshemderge qol jetkizý úshin Parlament qaraýyna engiziletin bıýdjet jobasy ázirlendi, – dedi Nursultan Nazarbaev.
О́z baıandamasynda Premer-Mınıstr S.Ahmetov 2014-2016 jyldarǵa arnalǵan respýblıkalyq bıýdjettiń negizgi parametrleri týraly málim etti.
– Atalǵan kezeńdegi ekonomıkanyń naqty ósimi 6-7 % deńgeıinde josparlanýda. Osy kórsetkishter negizinde 2014-2016 jyldarǵa arnalǵan respýblıkalyq bıýdjet ólshemi qalyptastyryldy, – dedi Premer-Mınıstr.
Sondaı-aq, S.Ahmetov Memleket basshysynyń ishki rezervterdi qarastyrý jónindegi tapsyrmasyn eskerip, respýblıkalyq bıýdjettiń shyǵysy ishki jalpy ónimniń 17,4 %-yn quraıtynynan habardar etti.
– Jergilikti bıýdjetter aıasynda sýbvensııa 81 mlrd.-qa qysqarady, al bıýdjettik aqshany alý, bizdiń óńirlerimizdi damytýdy eskere otyryp, 24 mlrd. teńgeni quraıdy. Respýblıkalyq bıýdjettiń bazasynda biz memlekettik bıýdjetti qalyptastyrdyq, onyń shyǵysy ishki jalpy ónimniń 20,4 %-yn quraıdy. 2014 jylǵa arnalǵan bıýdjettiń jańa bastamasy Sizdiń Qazaqstan halqyna Joldaýyńyzdan bastaý alady. Negizinen, ol damý baǵdarlamalaryn jáne daǵdarysqa qarsy sharalardy iske asyrýǵa baǵyttalady, – dedi Premer-Mınıstr.
S.Ahmetov jańa bıýdjettik saıasat tujyrymdamasy aıasynda Úkimet Ulttyq qordyń negizgi parametrlerin saqtaıtynyn da baıandady.
Ekonomıka jáne bıýdjettik josparlaý mınıstri E.Dosaev respýblıkalyq bıýdjet shyǵystardyń maqsatqa sáıkestiligi men obektıvtiligi qaǵıdattaryn eskerip qalyptastyrylǵanyn atap ótti.
– Bizdiń tarapymyzdan memlekettik salalyq baǵdarlamalardyń kópshiligi qaıta ázirlendi. Qarjy mınıstrligimen birlesip bıyl biz bıýdjet qarajatyn paıdalaný boıynsha aı saıyn monıtorıng júrgizemiz. Biz belgilengen paramaterlerge qol jetkizý úshin ıgerilmegen qarajatty azaıtý sharalaryn da qarastyramyz. Osy jyly ınvestısııalyq jobalar boıynsha qujattaryn usynbaǵan ákimshilerge ruqsat bermeımiz. Biz sondaı-aq memlekettik organdardy ustap turýǵa baılanysty aǵymdaǵy shyǵystardy qaıta qarastyrdyq, – dedi E.Dosaev.
Qarjy mınıstri B.Jámishev bıylǵy jáne kelesi jyldardaǵy salyqtyq túsimder ishki jalpy ónim deńgeıiniń 10,2 % mólsherinde josparlanǵanynan habardar etti. Ol respýblıkalyq bıýdjetti memlekettik salalyq baǵdarlamalar negizinde qalyptastyrý sońǵy nátıjeni naqty baǵalaı otyryp memlekettik shyǵysty keshendi josparlaýǵa múmkindik beretinine toqtaldy.
Memleket basshysy bıýdjettik qarajat el damýynyń basty parametrleri – ekonomıkanyń ósimin jáne jańa jumys oryndaryn ashý úshin qatań túrde jumsalýy tıistigin atap kórsetti.
– Salyqtyq jáne kedendik ákimshilendirý boıynsha keıbir máseleler bar. Mysaly, atap aıtqanda, ekonomıkanyń 20 %-ǵa jýyǵy «kóleńkeli» bolyp otyr.Sonymen qatar, negizdelmegen salyqtyq jeńildikterdiń basym kópshiligine taldaý júrgizý qajet. Tıisti salany damytý úshin olardyń tıimdiligine taldaý jasaý negizinde salyqtyq jeńildikterdi qaıta qarastyryp, qaıta bólý jónindegi jumysty jalǵastyrý talap etiledi, – dep atap ótti Qazaqstan Prezıdenti.
Nursultan Nazarbaev memlekettik qarajattyń shyǵysyna baqylaý jasaýǵa jáne olardyń der kezinde ıgerilýine jaýapkershiliktiń qajettigine nazar aýdardy.
– Jalpy, bıýdjet pen eldiń áleýmettik-ekonomıkalyq damýynyń orta merzimdi josparyn qalyptastyrý kózqarasyn jáne 2014-2016 jyldarǵa arnalǵan respýblıkalyq bıýdjet jobasyn maquldaımyn. Elimizdiń ishki jalpy ónimi ósetin bolady – bul úshin barlyq múmkindik bar. Biz Ulttyq qordyń qarajatyn osy maqsatta, ınfraqurylymdyq nysandarǵa paıdalanamyz, ol jańa jumys oryndaryn quryp, ekonomıkany, qurylys salasyn damytýǵa qosymsha serpin beredi, – dedi Memleket basshysy.
Qazaqstan Prezıdenti memlekettik qurylymdardyń barlyq shyǵysyna jáne olardyń ózara áserine tutas taldaý jasaý, sondaı-aq ulttyq holdıngter men kompanııalar eńbekkerleriniń ákimshilik jáne áleýmettik-turmystyq eńbek jaǵdaıyn jaqsartýǵa arnalǵan shyǵystardy ońtaılandyrý qajettigin atap ótti.
– Sonymen qatar, memlekettik menshiktegi, tıimsiz jáne beıindi emes mindet atqaratyn memlekettik obektilerdi jekemenshik sektorǵa berý jónindegi jumysty jedeldetken jón, – dedi Nursultan Nazarbaev.
Keńes qorytyndysynda Memleket basshysy qarastyrylǵan máseleler jóninde birqatar naqty tapsyrmalar berip, respýblıkalyq bıýdjet jobasyn el Parlamentiniń qaraýyna engizýdi tapsyrdy.
–––––––––––––––––
Sýretterdi túsirgender
S.BONDARENKO, B.OTARBAEV.
