Aımaq basshysy ózin-ózi jumyspen qamtyp otyrǵandarǵa bir rettik eń tómengi jalaqy kóleminde áleýmettik tólem berý máselesin de qozǵady. Ol úshin atalǵan sanattaǵy azamattardyń mártebesin qalyptastyrý jumysyn júrgizý qajet. Aımaqta shamamen mundaı sanatqa enetin 18 myńdaı adam bar. Tótenshe jaǵdaı kezinde olar memleketten aı saıyn áleýmettik tólemder ala bastaıdy.
A. Muhambetov beıresmı tabystardy jasyrý faktilerine erekshe nazar aýdardy. Búginge deıin ózin-ózi jumyspen qamtyp kelgen 723 adam áleýmettik kómek surap ótinish bergen. Ákim áleýmettik tólemge úmitkerlerdiń beıresmı tabystaryn jasyrý faktilerine nazar aýdarý kerektigine toqtalyp, keıbir paıdakúnem azamattardyń kesirinen kómekke shyn muqtaj adamdar qamqorlyqtan qaǵylmaýy tıis ekendigin eskertti.
Sonymen qatar, jıyn barysynda saqtandyrylmaǵan azamattarǵa 1 shildege deıin medısınalyq kómek tolyq túrde kórsetiletini belgili boldy. Sondaı-aq, tegin azyq-túlik alatyn azamattardyń tizimi keńeıtiledi. Buǵan deıin tegin azyq-túlik jıyntyǵy AÁK alatyn balalarǵa ǵana berilip kelgen. Endi 1, 2, 3-toptaǵy múmkindigi shekteýlilerge, balalarǵa jáne resmı tirkelgen jumyssyzdarǵa da tegin azyq-túlik sebetteri beriletin bolady.
Búgingi tańda Qostanaı oblysynda 28152 múmkindigi shekteýli adam bar, onyń 2974-i balalar, 4246-sy jumys istemeıdi. Aımaq basshysy bıznes ókilderin asa jaýapty áleýmettik jobany júzege asyrýǵa at salysýǵa shaqyrdy.
Qostanaı oblysy
