Tek memlekettik organdar, ákimdikter, aýrýhanalar, ishki ister organdary jáne kommýnaldyq qyzmet qana jumys isteıdi. Azyq-túlik dúkenderi men dárihanalar tek tańerteńgi 10.00-den keshki 18.00-ge deıin ǵana jumys isteıtin bolady. Adamdar tek qana jumys pen dúkenge shyǵa alady. Basqa ýaqyttyń bárinde kóshege shyqsa polısııa olarǵa 26 myń teńge kóleminde aıyppul salady. 65 jastan asqan adamdar úıden múlde shyqpaýy kerek. Olarǵa zeınetaqyny «Qazposhta» qyzmetkerleri jetkizip beredi.
Bul týraly búgin oblys ákimi Qumar Aqsaqalov óziniń brıfınginde málimdedi. Sonymen qatar ol aýylsharýashylyǵy ónimin óndirýshilerge ókimet 5 paıyzdyq jeńildetilgen nesıe beretinin, buǵan Memleket Basshysynyń sheshimimen memlekettik qordan 70 mlrd teńge baǵyttalǵanyn jetkizdi. Bizdiń oblysta ony alýǵa 300 dıhan tilek bildiripti. Al ShOB alty aıǵa deıin salyqtan bosatylatyn bolypty.
Qazir oblysta koronavırýs juqtyrǵan 7 adam tirkelgen. Olardyń bári juqpaly ınfeksııalyq aýrýlar stasıonaryna ornalastyrylǵan. Olarmen baılanysqa túsken, qatysqan, aralasqan adamdar tolyq anyqtalǵan. Sońǵy kúnderi qaladan indetke ushyraǵan úsh adam anyqtalǵan. Onyń ekeýi Jumyspen qamtý ortalyǵynda isteıtin áriptesterinen juqtyrǵan. Taǵy bir áıel ózi qyzmet isteıtin karantındik stasıonarda juqtyrǵan. Taıynsha qalasynan anyqtalǵan laborant bolyp isteıtin áıel ózderinde sanıtar bolyp istegen adamnan juqtyrǵan. Qazir Taıynsha qalasy men Kellerovka selosy da 14 kúnge karantınge jabylǵan.
Búgingi tańda Petropavlda zalaldanǵan bes oshaq bar. Bul kópqabatty úıler. Ákim óziniń málimdemesinde olardyń turǵyndaryna shydamdylyq tanytyp, qıyndyqty sabyrmen jeńýge, úıden shyqpaýǵa shaqyrdy. Indet juqtyrǵan bir áıel birinshi qalalyq emhanaǵa barǵan eken. Ákim, múmkin bolǵanynsha, halyqty osy emhanaǵa barmaýǵa shaqyrdy. «Eger ózderińniń boılaryńyzdan indettiń sımptomdaryn sezseńizder eshqaıda barmaı, 14-06 nemese 103 nómirlerine habarlasyńyzdar. Eshqaıda shyqpańyzdar. Sonda ǵana biz indettiń taralmaýyn qamtamasyz ete alamyz», dedi ol.
Soltústik Qazaqstan oblysy
