Keshe Indonezııa Prezıdenti Sýsılo Bambang Iýdoıononyń Qazaqstanǵa resmı sapary aıasynda Beıbitshilik jáne kelisim saraıynda Indonezııanyń mádenıet kúnderiniń ashylý saltanaty ótti. Ol Indonezııa halqynyń óneri men mádenıetin tanystyratyn foto jáne toqyma buıymdarynyń kórmesimen, sondaı-aq, óner sheberleriniń qatysýymen ótken gala-konsertpen aıshyqtaldy.
Keshe Indonezııa Prezıdenti Sýsılo Bambang Iýdoıononyń Qazaqstanǵa resmı sapary aıasynda Beıbitshilik jáne kelisim saraıynda Indonezııanyń mádenıet kúnderiniń ashylý saltanaty ótti. Ol Indonezııa halqynyń óneri men mádenıetin tanystyratyn foto jáne toqyma buıymdarynyń kórmesimen, sondaı-aq, óner sheberleriniń qatysýymen ótken gala-konsertpen aıshyqtaldy.
Bir halyq pen ekinshi halyqty eń aldymen mádenı turǵydaǵy baılanystar jaqyndastyrady. Bul oraıda Indonezııanyń baı mádenıetimen, ónerimen tanysýǵa keshe Beıbitshilik jáne kelisim saraıyna jınalǵan astanalyqtar qatary mol boldy. Toqyma buıymdar, sánmen tigilgen kóılekter men asyl tastardyń jáne fotolardyń kórmesi Indonezııanyń búgini men ótkeninen, turmysy men mádenıetinen syr shertkendeı áser qaldyrdy.
Gala-konsert bastalǵanda eki eldiń Mádenıet mınıstrleri sahnaǵa shyǵyp, 
kórermenderdi mádenı kúnderdiń ashylýymen quttyqtady. Aldymen sóz alǵan elimizdiń Mádenıet jáne aqparat mınıstri Muhtar Qul-Muhammed Indonezııa men Qazaqstan arasynda dıplomatııalyq, saýda-ekonomıkalyq, mádenı-gýmanıtarlyq baılanystardyń jıyrma jyldan beri óz deńgeıinde damyp kele jatqanyn, bul óz kezeginde álemdik aýqymdaǵy yntymaqtastyqqa jol ashqanyn baıandady. Sondaı-aq, eki el Prezıdentteriniń keshe Aqordada kezdesýi barysynda da birshama memorandýmdarǵa qol qoıylǵanyn, onyń ishinde Mádenı yntymaqtastyq týraly memorandýmnyń da bolǵanyn atap aıtty. Mınıstr sóz sońynda keler jyly Qazaqstannyń mádenı kúnderi Indonezııa astanasy Djakarta qalasynda ótetinin málimdedi.
Al Indonezııanyń Bilim jáne mádenıet mınıstri Muhammed Nýh eki halyqtyń memlekettik turǵydaǵy damýy men negizgi dinderiniń uqsastyǵyn, eki eldi de kóp etnostyń meken etetinin aıtty. Ol ári qaraı da mádenı baılanystardyń nyǵaıatynyna senimdi ekenin jetkizdi.
Gala-konsertte búgingi Indonezııanyń kelbetin beınelegen «Ǵajaıyp Indonezııa» derekti fılmi kórsetildi. Dızaıner Sonı Mýhınsonnyń sán úlgileriniń tanystyrylymy ótti. Sondaı-aq, Mavar Býdaıa toby men Bandýgı qalasynyń Bı mektebiniń ókilderi jáne basqa da birshama ánshiler men bıshilerdiń ónerleri pash etildi.
Aıgúl SEIILOVA,
«Egemen Qazaqstan».
