Qazirgi tańda elde 3,2 mln oqýshy qashyqtan oqytý formatyna kóshti. Negizinen telesabaqtar men arnaıy mamandandyrylǵan bilim beretin ınternet-platformalar qoldanylýda. Oqýshylarmen keri baılanys «Kúndelik», «Mektep.edu.kz» jáne «Bilimal.kz» elektrondy jýrnaldary, sondaı-aq, «Google Classroom», messendjerler, elektrondyq poshta jáne poshta qyzmeti arqyly jasalady. Barlyq telesabaqtar ınternette qoljetimdi. Bul, qajet bolǵan jaǵdaıda, vıdeosabaqtardy qaıta kórýge múmkindik beredi. Qosymsha retinde telesabaqtardyń radıo nusqasy da usynylǵan.
Dúnıejúzilik bank ókili atap ótkendeı, búgingi kúni barlyq elder jańa jaǵdaılarǵa beıimdelýge tyrysýda jáne bilim berýde ınternetke qosylý deńgeıine baılanysty túrli tetikterdi qarastyrýda.
Dúnıejúzilik bank kóptegen elge úzdiksiz bilim berý prosesin qamtamasyz etý maqsatynda qysqa merzimdi jáne uzaq merzimdi sharalar boıynsha usynystar berdi.
«Jalpy, Qazaqstannyń tańdaǵan tásilderi, tele jáne radıosabaqtardy paıdalanýdy qosa alǵanda, bizdiń usynystarymyzben sáıkes keledi, óıtkeni, eń mańyzdysy – qıyn jaǵdaılarda barlyq oqýshylardyń bilimge qol jetkizýin qamtamasyz etý. Sol sebepti sizder barlyǵyn durys istep jatyrsyzdar. Barlyǵy da basynan bastap 100% jumys istep ketedi dep kútýge bolmaıdy, sebebi barlyǵynyń osy jaǵdaıǵa beıimdelýi qajet», – dep atap ótti Dúnıejúzilik banktiń Qazaqstandaǵy turaqty ókili Jan-Fransýa Marto.
Sonymen qatar ol qazirgi ýaqytta Sıngapýrda júrgen týystarynyń onlaın-oqýǵa kóshkenin jáne olardyń da qıyndyqtarǵa tap bolyp jatqanyn aıtty.
IýNISEF-tiń Qazaqstandaǵy ókildigi ókil Artýr van Dızenniń atynan Qazaqstan Respýblıkasynyń Bilim jáne ǵylym mınıstrligine resmı hat joldap, onda COVID-19 pandemııasyna baılanysty tótenshe jaǵdaı kezeńindegi tabysty yntymaqtastyǵy úshin alǵys bildirdi.
Hatta «IýNISEF Qazaqstan Respýblıkasy Bilim jáne ǵylym mınıstrliginiń karantın men qashyqtan jumys isteý rejımine qaramastan, oqý prosesin qamtamasyz etý boıynsha basqa memlekettik organdarmen áriptestikte tanytqan kúsh-jigerin quptaıdy. Sondaı-aq mınıstrlik úıde bolǵan kezeńde balalardyń bilim alýyn qıyndatatyn, mysaly, ınternet jyldamdyǵynyń tómendigi, kompıýterlik jabdyqtyń joqtyǵy, mektepterdiń daıyndyǵy, psıhoáleýmettik jaǵdaı sııaqty keıbir kedergiler men shekteýlerdi eskerýde jáne qalyptasqan ahýaldy nazarǵa ala otyryp, qabyldanatyn sheshimderin jaǵdaıǵa qaraı beıimdeý úshin qajetti qadamdar jasaýda, ádistemelik jáne tehnıkalyq máseleler, qolda bar oqytý platformalary men arnalardy jandandyrý boıynsha jumystardy jalǵastyrýda» delingen.
Eki halyqaralyq uıym da tótenshe jaǵdaı kezinde Bilim jáne ǵylym mınıstrligine qashyqtan oqytý máselelerinde qoldaý kórsetýdi jalǵastyrýǵa daıyn ekenin málimdedi.
