Bárimiz vırýsqa qatysty máseleni oılamaýǵa, kóńilimizdi basqa arnaǵa burýǵa tyrysamyz. Bir-birimizdi qoldap, aýdıohabarlama, sýret, jazbalar jiberemiz. Aqparat aıdyny da túrli kontentke toly. Áıtse de kóńilge medet berer, senim uıalatar maqalanyń orny bólek. Osy oraıda, Tuńǵysh Prezıdent – Elbasy Nursultan Nazarbaevtyń «Egemen Qazaqstan» gazetinde jarııalanǵan «Birlese bilgen el bárin jeńedi» atty maqalasy (8 sáýir, 2020 jyl) oqyrmanǵa erekshe serpin bergenin aıta ketken jón.
Shynyn aıtý kerek, Elbasynyń ár maqalasyn yjdaǵatpen oqımyn. Bálkim, buǵan jýrnalıstıka salasynda júrgenim de áser etetin shyǵar. Onyń ústine, aınalamdaǵy adamdardy maqalanyń bóligin, qysqasha tujyrymyn nemese oǵan qatysty pikirin emes, resmı jerde jarııalanǵanyn tolyqtaı oqýdy usynamyn. Bul joly da solaı boldy. Maqalada bizge jetispeı jatqan kóp másele qamtylǵan. Birinshiden, biregeı ómir tájirıbesi bar tulǵa aldaǵy kezde elimizde bári jaqsy bolatynyn baıandaǵan. Ekinshiden, bárimiz birge bolǵanda ǵana indetten qutylatynymyzǵa senim uıalatady.
Tótenshe jaǵdaı elimizde Volonter jylymen tuspa-tus kelip otyr. Osy oraıda alǵa qoıǵan baǵytymyzǵa baıyppen qarap, mańyz bere bastadyq. Ásirese volonterlik jumysqa qatysy joq kóptegen tanysym erikti túrde kómektesýge atsalysyp jatyr. Áleýmettik jelilerge jazyp, telefonǵa habarlasyp, qalaı qol ushyn soza alatynyn suraıdy. Bul bizdi yntalandyra túsedi.
Elbasynyń maqalasy erekshe yntalandyrdy. Maqalada qandaı aýyr joldan ótkenimizdi, aldaǵy kúnniń jaqsylyqtaryn shynaıy túrde sezinesiz. Bul pandemııany da eńseretinimiz anyq.
Osyndaıda, mańyzdysy – indet aıaqtalǵannan keıin kim bolamyz, qaıda baramyz? Dál qazir boıkúıezdikke salynyp, úmitin joǵaltqandar erteń ókinetini anyq. Al elge kómek qolyn sozýǵa talpynǵandar ǵana árdaıym bıik belesten kórinedi. Elbasy óz maqalasynda aıtqan «Adamnyń ózine degen senimi – úlken kúsh. Bul boıymyzǵa – qajyr, denemizge – qýat, júregimizge senim uıalatady», degen sózi – kóńilge medet.
Respýblıkalyq «Birgemiz» qorynyń qamqorshylyq keńesine kirgenim – maǵan artylǵan úlken senim. Qor Tuńǵysh Prezıdent kásipkerlerdi otandastarymyzdy qoldaýǵa shaqyrǵannan keıin quryldy. Sodan beri mol qarajat jınalyp, el aýmaǵyndaǵy muqtaj jandarǵa kómek retinde úlestiriledi. Osy jumystyń basy-qasynda júrip, 100-den astam otbasyn aralap, tizim jasadyq. Indetpen kúresý úshin aýqymdy jumys atqarylyp jatyr. Dárigerler, áskerıler, polıseıler, memlekettik qyzmetkerler, sondaı-aq volonterlerdiń eren eńbegin maqtan tutamyn. Sondyqtan bir-birimizdi qoldap, úmitimizdi joǵaltpaı, kóńilimiz kóterińki bolsyn degim keledi. Súleımen paıǵambar aıtqandaı, «bári ótedi, muny da eńseremiz».
Aısulý ERNIIаZOVA,
«Qazaqstan volonterler lıgasy» qoǵamdyq qorynyń tóraǵasy
