Memleket basshysy aıtqan «Biz birgemiz!» sóziniń astaryndaǵy atan túıege júk bolarlyq mol maǵyna jalpaq jurttyń boıyndaǵy senimdi nyǵaıta túsýde. Bekem birlikke ne jetsin, shirkin! Oblys ortalyǵyndaǵy «Novopek» kompanııasynyń dál osy shaqta sharýasyn yńǵaılap, óz jumysshylarymen qosa jumyssyz qalǵandarǵa da qaıyrymy tıip jatýy jyly sózge ábden laıyqty is. Kásiporyn óndiris kólemin keńeıtý arqyly taǵy da 100 adamdy jumysqa almaq.
– О́z jumysshylarymyzdyń ishinde baspanasyz júrgenderdi jańa jataqhanamyzǵa ornalastyrmaqshymyz. Kásiporynnyń 500 jumysshysyna sál de bolsa demeý bolarlyq azyq-túlik sebeti tabys etildi. Aldaǵy ýaqytta jalaqyny da táp-táýir kóbeıtpekpiz, – deıdi kompanııanyń bas dırektory Rústem Ýsmanov.
Jańa jumysqa ornalasqan tigin sehynyń operatory aldymen tájirıbeden ótkiziledi. Birinshi aıda oǵan 60 myń teńge jalaqy tólenedi. Ekinshi aıda istegen jumysyna eńbekaqyǵa qosymsha 30 myń teńge tóleý qarastyrylǵan. Úshinshi aıda óz tabysyna 15 myń teńge ústemelenedi. Odan ári atqarǵan jumysyna sáıkes jalaqy alady. Jalaqy mólsheri 80 myń teńgeden kem emes. Mine, osylaısha árbir mamandyq boıynsha tapqan tabysynyń ústine ústemeaqy tóleý kózdelip otyr. Máselen, tiginshiler alǵashqy aıdaǵy úırený kezinde 60 myń teńge eńbekaqy alady. Ekinshi aıdan bastap atqarǵan jumysyna sáıkes jalaqy tólenedi. Bul jerge tipti mamandyǵy joq adamdar da qosalqy jumysshy retinde jumysqa ornalasa alady. Eńbekaqylary da táp-táýir. 90 myń teńge shamasynda.
Kásiporyn aýmaǵynda qaýipsizdik sharalary muqııat qolǵa alynǵan.
KО́KShETAÝ
