Baltyq jaǵalaýynda ótetin baıraqty básekege 24 eldiń ulttyq quramalary qatysýǵa tıis. Tarqatyp aıtsaq, Eýropadan – 7, Azııadan – 5, Ońtústik Amerıkadan – 4, Soltústik Amerıkadan – 4, Afrıkadan – 3 jáne Muhıt jaǵalaýynan – 1 komanda. Bul jarysqa Latvııa jan-jaqty daıarlanyp, uıymdastyrý máseleleri tolyqtaı sheshilip te qoıǵan edi. Biraq koronavırýske baılanysty barlyq jospardyń kúl-talqany shyqty. Qazirgi kezde FIFA álemdik dop dodasyn sál keıinirek ótkizý jaǵyn qarastyrýda. Al naqty qaı ýaqytta ekeni birer kúnnen keıin belgili bolady.
Esterińizge sala keteıik, Qazaqstannyń fýtzalshylary osyǵan deıin álem chempıonatyna eki márte qatysty. Azııa fýtbol konfederasııasynda júrgen kezde jerlesterimiz 2000 jyly Gvatemaladaǵy týrnırdiń toptyq básekesinde súrindi. ÝEFA-ǵa ótkennen soń kórsetkishimiz birshama jaqsardy. 2016 jyly Kolýmbııada jalaýy jelbiregen jarysta óz tobymyzda ekinshi oryn alyp, pleı-offqa joldama aldyq. Alaıda 1/8 fınalda dańqty Ispanııa quramasyna ese jiberdik.
