Biraq munyń oba ekenin uqpaýǵa bolmaıdy. Azýyn aıǵa bilegen Amerıkanyń ózinde búgingi tańda 18 myńnan artyq adam qyryldy. 11 sáýirdegi derekke qaraǵanda álemde 1 mln 700 myńnan artyq adam osynyń dertine ushyraǵan. Sonyń ishinde ólgenderi júz myńnan artyq.
Búgingi tańda Qazaqstanda 859 adamnyń zaqymdanǵany belgili bolyp otyr. Toqyraý joq, kúnde ósý bar. Sońǵy táýlikterde ǵana olardyń sany 47 adamǵa artty. Osy bárimizdi oılantýy kerek. Prezıdent Q.Toqaev jaǵdaıdyń ońalmaı turǵanyn eskerip, karantın rejimin taǵy da on bes kúnge ulǵaıtýǵa sheshim qabyldaýǵa májbúr boldy. Bul sheshimdi durys dep sanaımyz, óıtkeni indetti aýyzdyqtaı almaı otyrmyz. Kerisinshe ol ulǵaıyp barady.
Osyndaıda jeke adamdardyń, ásirese alǵa qoıylǵan maqsatty bultartpaı oryndaýdaǵy jergilikti basshylardyń iskerligi sheshýshi faktorlardyń biri ekendigi sózsiz. Osy oraıda Soltústik Qazaqstan oblysynyń basshylyǵy týraly aıtpaı ketýge bolmaıdy. О́tken joly ǵana biz Soltústik Qazaqstan oblysynyń ákimi Qumar Aqsaqalovty rýhanı jańǵyrý salasyndaǵy sylbyrlyqtary úshin synaǵan edik. Alaıda ol ómirdiń ózi talap etken myna jaǵdaıda tamasha iskerlik kórsetip otyr. Barlyq komandasyn, sonyń ishinde qala ákimi Bolat Jumabekovty Prezıdenttiń tapsyrmasyn buljytpaı oryndaý jolyna jiti jumyldyrýynyń arqasynda qazirgi sátterde koronavırýsty quryqtaýǵa birshama qol jetkizdi. Sońǵy aptada indetpen Soltústik Qazaqstanda birde bir adam tirkelgen joq. Buryn tirkelip, emdeýge alynǵandardyń ishinen bireýi aıyǵyp shyqty.
Stasıonardaǵy 24 naýqas barlyq talaptarǵa saı em-domdar qabyldaýda jáne olarmen qatynasý qatty baqylaýǵa alynǵan. О́kpeni jasandy jolmen tazalaıtyn jetildirilgen bes apparatty jýyrda oblys ákimi taǵy da jetkizip berdi. Qazir osyndaı 10 apparat bar.
Infeksııamen alysyp jatqan úsh dáriger, tórt medbıke, bes sanıtar aıryqsha jaǵdaıda saqtalǵan. Aýysymnan shyqqan brıgadanyń ústi-basy tegis dızenfeksııalanyp, eshkimmen baılanysqa túspeı ózderi ǵana turatyn «Altyn Orda» qonaqúıiniń nómirlerine arnaýly kólikpen jetkiziledi. Osy jerde ishetin as-aýqaty da syrttan berilip, eshkimmen aralastyrylmaıdy. Belsendi qoǵamdyq uıymdardyń biri olarǵa bir rettik kıim, taǵy biri barynsha dámdi taǵam daıyndap berýdi moıyndaryna alǵan. Úı-ishi, bala-shaǵalarymen olar tek telefon arqyly habarlasady. Keıbir oblystarda qosymsha aqy tóleý týraly sheshimniń endi ǵana qabyldanyp jatqanyn estımiz. Al bizdiń dárigerler naýryz aıyndaǵy qosymsha aqy – 825 myń teńgeni tegis alǵan. Árıne, yntalandyrýdyń eń zory osy ekeni sózsiz.
Qala kóshelerine shyqsańyz júrginshi múlde az. Áne jer, myna jerde qarań-qurań adamdardy kezdestiresiz. Oblys basshylyǵy efırge jıi shyǵyp, turǵyndarǵa karantın talabyn saqtaýdy ótimdi sózdermen jıi aıtyp otyrady.
Al qala kóshelerine shyǵy qalǵandardy kóshedegi patrýl toqtatyp jatady. «Barlaýǵa» shyqqan osy joldardyń avtoryn da toqtatyp, tergeýge aldy. Qaltamda dári alatyn resebimdi kórsetip, dárihanaǵa baratynymdy aıtyp qana aman óttim. Árıne, jýrnalıst edim dep jónimdi aıtsam da qoıa beretin shyǵar, biraq men ınkognıto qalpymdy olardyń jumystaryna adaldyǵyn bilmek úshin saqtap qaldym.
Kóshelerdi KamAZ-dar jarysyp, dızenfeksııalap júr. Árıne, Nur Sultandaǵydaı jetildirilgen tehnıkalary joq, sondyqtan aq túspen syrlanǵan eski kólikterdiń ózimen-aq jappaı dızenfeksııalaýda. Qalaı desek te karantınniń talaptary qatań saqtalǵan. Joǵarydaǵy jetistik osyndaı jiti isterdiń nátıjesi. Alla da «saqtansań saqtarmyn» degen ǵoı. Karantınniń talabyn qazaqpaıshyl «uzyn arqan, keń tusaýǵa» salmaı, tym bolmasa osy synaq kúnderi qatań saqtaıtyn bolsaq indetti jeńetin sııaqtymyz. Basqalar da bizden úlgi alsa eken deımiz.
Soltústik Qazaqstan oblysy
