Atalǵan joba aıasynda aldaǵy birneshe jylda gýmanıtarlyq bilimniń barlyq baǵyty boıynsha dúnıe júzindegi eń bedeldi ýnıversıtetterdiń oqýlyqtary shet tilderinen qazaqshaǵa aýdarylyp, stýdentterimizge álemdegi úzdik JOO-nyń tańdaýly úlgilerimen bilim alýǵa múmkindik týdy. Qazirdiń ózinde 42 kitap «qazaqsha sóılep tur», qalaǵan adam oqýlyqtardy kitap.kz elektrondy ashyq kitaphanasynan taýyp, oqı alady. Aýdarylǵan kitaptar bıznes, menedjment, dıplomatııa, fılosofııa, halyqaralyq quqyq, marketıng, ádebıet, til, óner, pedagogıka, psıhologııa, áleýmettaný, medıa, ekonomıka, tarıh, din, fılosofııa álemin qamtıdy. Oqýlyqtar respýblıka boıynsha 130 JOO-na taratyldy.
Osy bir úlken isti uıymdastyryp otyrǵan úkimettik jáne kommersııalyq emes «Ulttyq aýdarma bıýrosy» qoǵamdyq qorynyń ókilderi aýdarylatyn kitaptardy tańdaý úshin elimizdegi barlyq oqý oryndarynan usynys jınalyp, jalpy sany 800-den asa oqýlyq ataýy kelip túskenin málimdedi. Jınaqtalǵan tizimderdiń negizinde birneshe ret basylǵan, sońǵy basylymy keıingi 3 jylda shyqqan, mazmundyq turǵydan beıtarap bolýy qajet degen talaptarǵa súıene otyryp, 2017 jylǵa 18 oqýlyq tańdaldy. Josparǵa saı, bul oqý quraldary qazaq tiline aýdarylyp, JOO-na tegin jetkizildi. Jańa oqýlyqtar 2018-2019 oqý jylynan bastap joǵary bilim berý júıesine engizildi.
Dál osy 2018 jyldyń alǵashqy jartyjyldyǵynda ótken 18 oqýlyqtyń tanystyrylymyna Elbasy N.Nazarbaev arnaıy qatysqan bolatyn. Sondaǵy sózinde N.Nazarbaev:
– Jastarymyz joǵary ǵylymı standarttarǵa sáıkes bilim alýǵa tıis. Sondyqtan biz 800 kitaptan turatyn úzdik oqýlyqtardyń aýqymdy tizimin ázirledik. Ulttyq aýdarma bıýrosy qurylyp, jumysyna kiristi. Búgingi alǵashqy zııatkerlik transh AQSh, Reseı, Ulybrıtanııa, Fransııa jáne Shveısarııa sııaqty aldyńǵy qatarly elderdiń eń úzdik ǵylymı eńbekterin qamtıdy. Jańa oqýlyqtar – eksklıýzıvti gýmanıtarlyq kitaphana. Bul oqýlyqtar kópshilik úshin kitap túrinde, elektrondy onlaın nusqasynda jáne úzdik lektorlardyń ashyq dáristeriniń vıdeotekasy sııaqty úsh formatta qoljetimdi bolmaq. Kitaptar latyn qarpinde basyp shyǵarylǵannan keıin, olardy shetelde turatyn jastarymyz da oqı alady, – dedi. Sondaı-aq osy otyrysta Elbasy Úkimet pen Ulttyq aýdarma bıýrosyna atalǵan jobany odan ári jetildirip, josparǵa saı júıeli jáne jemisti júzege asyrýǵa tapsyrma bergen bolatyn.
Qazirgi tańda 26 kitap aýdarylyp jatyr. Olardyń qatarynda kıno, estetıka, zań, antropologııa, etnologııa, ekonomıka, mýzyka, qarjy, teatr, statıstıka, saıasattaný, medıa salasyna qatysty tańdaýly oqýlyqtar bar. Iriktelgen oqý quraldaryn qazaq tiline aýdarýǵa Qazaqstannyń aldyńǵy qatarly oqý oryndarynyń oqytýshylary, bilikti aýdarmashylar men redaktorlar, jalpy sany 300-ge jýyq maman qatysýda. Mátinder ádebı jáne ǵylymı redaksııalaýdan ótedi. Mundaı aýqymdy ǵylymı aýdarma jobasynyń Qazaqstanda buryn-sońdy iske aspaǵanyn eskersek, 100 oqýlyqtyń gýmanıtarlyq sala mamandary úshin altyn qor bolatyny aqıqat.
