(Oralhan oıǵa oralǵanda)
Oralhan «Lenınshil jasqa» qyzmetke shaqyrylyp, alǵash Almatyǵa kelgen kúni bizdiń úıge kelip qondy. Bul bizdiń tuńǵysh tanysqan sátimiz. Oǵan deıin Oralhandy redaksııaǵa joldaǵan jazbalary arqyly syrttaı ǵana tanıtynmyn. Al beıtanys jigittiń taban astynda atbasyn bizdiń úıge tireýi kezdeısoqtyq pa, joq álde Jaratqannyń jazýy ma, ol jaǵyn kesip aıtý qıyn.
(Oralhan oıǵa oralǵanda)
Oralhan «Lenınshil jasqa» qyzmetke shaqyrylyp, alǵash Almatyǵa kelgen kúni bizdiń úıge kelip qondy. Bul bizdiń tuńǵysh tanysqan sátimiz. Oǵan deıin Oralhandy redaksııaǵa joldaǵan jazbalary arqyly syrttaı ǵana tanıtynmyn. Al beıtanys jigittiń taban astynda atbasyn bizdiń úıge tireýi kezdeısoqtyq pa, joq álde Jaratqannyń jazýy ma, ol jaǵyn kesip aıtý qıyn.
Naq sol kúni aqyn Tólegen Aıbergenovtiń jylyna oraı redaksııada qyzmet isteıtin áıeli Úrnısa ujymdy úıine shaqyrǵan. Oralhandy da erte barǵanbyz. Qaıtar kezde esik aldynda ońasha turǵan Oralhannan qaıda toqtaǵanyn suradym. «Ony ózim de bilmeımin, qonaq úı izdeıtin shyǵarmyn» degen jaýap aldym. Sóıtse tańerteń shamadanyn vokzalda qaldyryp, birden redaksııaǵa kelgen eken. Men oılanbastan úıge shaqyrdym. Sodan eki aıdan astam ýaqyt, elden kelinshegi Aıman kóship kelip, jalǵa páter taýyp alǵansha bizdiń otbasynyń bir múshesi bolyp ketti.
Mine, sol bir sátti kúnnen bastalǵan araqatynasymyz ol issaparmen Úndistanǵa attanǵanǵa deıingi aralyqta ótken shırek ǵasyrda sharbolattaı shyńdalyp, shynaıy dostyqqa aınalǵan edi. Týystaı tabysyp, aǵaıyndaı aralastyq, jan syrymyzdy, qýanysh-qaıǵymyzdy bólistik. Rııasyz syılastyǵymyzdyń syryn ketirmeı, adal dostyǵymyzdy aıalap ǵumyr keshtik. Iá, Oralhan meniń naǵyz dosym edi. Tipti, basqalar túgil, «jeti jetim» ishinde de Oralhan ekeýmizdiń jaqyn-jarastyǵymyz bólekshe bolatyn. Endi mine, tiri bolsa jasy jetpiske tolýyn toılap jatatyn sol erte aıyrylǵan esil dosymdy esime alyp, syr bólisip otyrǵan jaǵdaıym bar. Qudaı basqa salǵan soń kónbeske ne shara?! Taǵdyrdyń jazýy osylaı bolǵany da...
Oıda joqta Oralhannan aıyrylyp, ortamyzdyń oısyrap qalǵanyna týra jıyrma jyl tolypty. Bul bir bizder, otbasy, qatar júrgen dostary ǵana emes, jalpy el-jurtynyń eńsesin ezgen oqys oqıǵa, qabyrǵasyn qaıystyrǵan qaza bolatyn. Mezgilsiz, tótesinen kelgen ajalǵa qansha qaıǵyryp-qapalansaq ta, artynyń qaıyryn tilep, shúkirshilikke júginýge májbúrmiz. О́zi ólse de sózi tiri jazýshynyń ǵıbratty ǵumyry jalǵasyp, qalyń eli qazaǵynyń jadynda júrgeni kóńilge medet. Kórkem shyǵarmalary kópshiliktiń kóńilinen shyǵyp, esimi qazaq ádebıetiniń tarıhyna jazylǵan jaısań jazýshy Oralhan Bókeıdi ulty ulyqtap, qurmet kórsetip, jetpis jyldyq mereıtoıyn ótkizip jatqandyǵy qandaı keremet! Has talantqa, dara darynǵa degen taǵzym, eńseli eldiktiń belgisi osyndaı bolsa kerek!..
Oralhan aıaýly atamekeni – Altaı aımaǵynyń tylsym tabıǵaty men qarapaıym adamdarynyń bolmys-bitimin, tiri beınelerin óz shyǵarmalarynda jarqyrata jazǵan-tyn. Kúndelikti kúıbeń tirshiliktiń, almaǵaıyp áleýmettik ómirdiń tynysyn tap basyp, kórkemdik shyndyqtyń kóriginde shyńdap, boıamasyz bolmysyn jerine jetkize jazý arqyly súleı sýretkerligin tanytqan orny bólek jazýshy Oralhan edi. Onyń san salaly taqyrypty qamtyǵan, qıly taǵdyrly keıipkerler somdaǵan kórkem shyǵarmalarynyń oqıǵalary da qııaldan qurastyrylmaǵan. Shynaıy shyndyq – kórkem ádebıettiń kórki ekendigin jan-júregimen túsingen jazýshyǵa tán osy qasıet Oralhan kórkemsózderindegi keıipkerleri – aýyldastarynyń ómir-tirshiligine arnalǵan kórkemsózderine de kóshken. Oǵan kóz jetkizgińiz kelse taıaýda jaryq kórgen «Bizdiń Oralhan» degen qalyńdyǵy súbe qarys kitapty oqýyńyz kerek. Onda qalamgerdiń jerlesteri jazǵan estelikter men sýretter toptastyrylǵan. Kitapty oqý barysynda Oralhannyń áńgime-povesteriniń tiri keıipkerlerimen tanysyp, tildesesiz. Jazýshynyń el-jurtynyń júreginde óshpesteı iz qaldyrýynyń basty syry osy bolsa kerek. Al Oralhandy kórkem ádebıetke ákelgen onyń ocherkteri, ıaǵnı jýrnalıstik joly bolatyn. Bul janrda O. Bókeı salǵan sony soqpaqty qalamgerler qaýymy túgel moıyndaǵan. Onyń keıipkerlerin óńirine qadaǵan orden-medaldaryna qar
