10 qyrkúıek. Saǵat 11-30.
Qazir ǵana Astanadaǵy «Astana-Arena» sport kesheninde 2014 jylǵy álem chempıonatynyń irikteý týrnırinde Qazaqstan men Shvesııa quramalary kezdesip, oıyn 1:0 esebimen qonaqtardyń paıdasyna sheshildi. Matchtaǵy jalǵyz goldy shvedtter quramyndaǵy eń tanymal da sheber oıynshy Zlatan Ibragımovıch 28-sekýndta soqty.
Bizdiń jigitter tap mundaı sátsizdikti kútpese kerek, oıyn bastalmaı jatyp salynǵan gol olardy biraz ýaqytqa deıin óz-ózderine keltire qoımady. Bir qyzyǵy, alǵashqy dopty tez salyp alǵan shvedter de osyǵan qanaǵattanǵan túr bildirip, jańa qarqyndy shabýylǵa asyǵatynyn baıqatpady. Osyndaı maıda oıyn qazaqstandyqtardyń tizgindi múmkindiginshe tezirek qolǵa alýdaryna múmkindik berdi. Osynyń nátıjesinde olar aqyryn shabýylǵa da shyǵa bastady. Kóp uzamaı Dmıtrıı Shomkonyń sol qaptaldan jasaǵan joryǵy qarsy qaqpaǵa birinshi qaýip týdyryp úlgerdi. Biraq aıyp alańyna jetken dopqa bizden ege bolatyn eshkim tabylmady.
Budan keıin oıyn eki jaqtyń alma-kezek shabýylymen ótip jatty. Munda meımandardyń azdaǵan basymdylyǵy bilindi. Biraq qarsylastar esepti ózgerte almady.
Al ekinshi taımnyń basynda Qazaqstan quramasy esepti teńestirip kete jazdady. Buǵan Svensenniń óz aıyp alańyna jaqyn jerde tártip buzǵany sebepkerlik etti. Aıyp dobyn urýǵa kelgen Andreı Fınonchenko ony aıyp alańyna áýeletip jetkizý ornyna tóteletip jóneltti. Oǵan shved qorǵaýshylarynyń biri buryn jetti. Biraq dopty alysqa uzatyp úlgere almady. Sosyn kezekti márte berilgen dopqa Sergeı Hıjnıchenko ıelik etti. Al onyń soqqysyn qorǵaýshy Isaksson qaıtardy.
Qazaqstandyqtar budan keıin de ashyq belsendilik tanytty. Shvedter óz kezeginde osyǵan erik berip qoıyp, báseńdik kórsetti. Soǵan qaramastan, olar 64-mınýtta taǵy bir gol soǵyp ketýge shaq qaldy. Alaıda, Ekdaldiń alystan urǵan doby qaqpa baǵanynan keıin qaıtty.
Arada bes mınýt ótkende bizdiń jigitter taǵy eki qaýipti shabýyl jasady. Aldymen Maqsat Baıjanov shvedter aıyp alańynda ashyq qalyp, dop qabyldady. Biraq ony ura almady. Kelesisinde Shomka alystan soqqy jasady. Ony Isaksson qaıtardy.
Oıyn osy qalpynda sońyna jetti.
Damır Qojamqul.
Qazirge deıin myna komandalar arasyndaǵy nátıjeler belgili bolyp otyr:
Reseı – Izraıl 3:1
Lıtva – Lıhtenshteın 2:0
Armenııa - Danııa 0:1
