2017-2019 jyldar aralyǵynda sol jaǵalaýda memlekettik bıýdjet jáne jeke ınvestorlardyń esebinen kópqabatty 48 turǵyn úı, Jastar resýrstyq ortalyǵy, Qazaq ortalyq atqarý komıtetiniń mýzeıi, «Bolashaq» ýnıversıtetiniń oqý korpýsy, 700 oryndyq jeke mektep jáne 320 oryndyq balabaqsha boı kótergen.
«Bolashaq» ýnıversıtetiniń 12 qabatty ǵımaratynda «Bolashaq-Startap» ınnovasııalyq ıdeıalardy iske asyrý ortalyǵy, kovorkıng ortalyǵy, ǵylymı-zertteý ınstıtýty, agrobıotehnologııalardyń ǵylymı zerthanasy, áleýmettik-ekonomıkalyq jáne saıası zertteýler ortalyǵy, telestýdııa, dızaın jáne horeografııa stýdııalary, jastar teatry jumys isteıdi.
Jastar resýrstyq ortalyǵynda IT-park, fıtnes zal, kitaphana, kovorkıng bólmesi jáne antıkafe bar. Munda stýdentter men oqýshylar aqparattyq tehnologııalardyń qyr-syryna úńilip, bilimderin arttyra alady. 3D stýdııa jáne robottandyrylǵan tehnıkany meńgerýge de múmkindik qarastyrylǵan.
Aralaý barysynda oblys ákimine sol jaǵalaýda salynatyn áleýmettik-mádenı jáne bilim berý nysandar týraly málimet berildi. Jobaǵa sáıkes aldaǵy ýaqytta munda 300 oryndyq kópbeıindi aýrýhana, 300 oryndyq fızıka-matematıka mektebi, drama teatr, 900 oryndyq orta mektep, neke saraıy jáne bıznes ortalyq boı kóteredi.
Qazir kópqabatty 5 turǵyn úıdiń qurylysy júrip jatyr. Bıyl «Nurly jer» memlekettik baǵdarlamasy aıasynda taǵy kópqabatty 12 úıdiń qurylysy bastalady dep kútilýde.
Aımaq basshysy Shirkeıli kanaly arqyly ótip, sol jaǵalaý men «Batys Eýropa-Batys Qytaı» kólik dálizin baılanystyratyn kópir qurylysymen tanysty.
Tórt jolaqty kópirdiń uzyndyǵy - 102,8, eni - 21 metr. Qurylys jumystary respýblıkalyq jáne jergilikti bıýdjet esebinen júrgizilip jatyr. Qazir respýblıkadan qaralǵan qarajat tolyq ıgerilgen.
– Oblysta qarjylandyrýdy qajet etetin jobalar kóp. Bastalǵan jobalar, atap aıtqanda osy kópir qurylysy der kezinde aıaqtalýy kerek. Sonymen qatar biz turǵyndardyń, ásirese az qamtylǵan otbasylardyń ál-aýqatyn oılaýymyz qajet. Sondyqtan qarjyny bóler aldynda, búgingi jaǵdaıǵa ıkemdelgen, eń qajet degen jobaǵa basymdyq beriledi, - dedi oblys ákimi.
О́ńir basshysy nysandardy aralaý sońynda sol jaǵalaýdy damytý jobasy jalǵasatynyn aıtyp, ásirese turǵyn úı qurylysynyń sapasy men merzimine kóńil bólýdi tapsyrdy.
