Onda koronavırýstan jazylyp shyqqan qala turǵyny oblystyq juqpaly aýrýlar aýrýhanasynyń medısına qyzmetkerlerine erekshe alǵysyn bildiredi.
«Búgin úıge kelgenimizge eki kún bolady. Kóńil-kúıimiz ben densaýlyǵymyz jaqsy. Osydan 15 kún buryn aýrýhanaǵa túskende óte qatty úreıde bolǵanymyzdy jasyrmaımyn. Sol sátte dárigerler janymyzdan tabylyp, kóńilimizdi aýlap, psıhologııalyq qoldaý kórsetti. Bizben birge ýaıymdap, zertteý nátıjelerin taǵatsyzdana kútti. Palataǵa «Biz birgemiz, biz jeńemiz!» dep kiretin dárigerlerdiń daýysynan eńsemiz kádimgideı kóteriletin. Shyn aıtam, bul tórt qabyrǵaǵa qamalyp, eńsesi ezilgen naýqastarǵa úlken demeý berip, jiger syılady» deıdi hat ıesi.
Odan ári hat ıesi aq halatty abzal jandar ózin ǵana emes 87 jastaǵy ájesin, ákesi men anasyn, ápkeleri men inisin emdep shyqqanyn jazady. Sonymen qatar, juqpaly aýrýlar aýrýhanasynyń dárigerlerine, ondaǵy orta býyn qyzmetkerlerge alǵysyn jetkizip, eńbekterine tabys tileıdi.
