«Aıdyn jyrdyń qos aqqýy» atanǵan eki aqynnyń arasyndaǵy dostyq áli úzilgen joq. Sońǵy jyldary Áselhan Ásııasyn izdep Qostanaıǵa birneshe ret kelip ketti. Ásııa apamyz da árneni sebep etip, qoly qalt etkende ońtústikke baryp, Kámshat apasyna uqsaıtyn qurdasynyń qurymdaǵan shaıyn iship, saǵynysh qumaryn tarqatyp keledi.
«Otyrar» ensıklopedııasynda Áselhannyń aıtys ónerine qosqan úlgi-ónegesi týraly: «Aqyn apa aıtys áleminde alyp samuryqqa uqsaıtyn, qanatymen daýyl turǵyzyp, ekpinimen naızaǵaı oınatatyn, eliniń eń súıikti perzentine aınalǵan. Respýblıkamyzǵa tanymal belgili aqyndardyń bárimen kezdesip, aımaqtyq, respýblıkalyq, halyqaralyq kóptegen dúbirli aıtystarda namysty qoldan bermegen, ot aýyzdy oraq tildi, arqaly aqyn» - dep jazylypty. Bul anyqtama Ásııa apamyzǵa da quıyp qoıǵandaı shaq ekenine shák keltirmeńiz.
Ásııa – aıtysker aqyn, tálimger ustaz. 2000-shy jyly Ahmet Baıtursynuly atyndaǵy Qostanaı memlekettik ýnıversıteti janynan «О́ner stýdııasyn» ashty. Bul ortalyq búginde jastar shyǵarmashylyǵyn shyńdaıtyn naǵyz óner mektebine aınalǵan. Stýdııada talapker aqyndarmen qatar, ónerli jastar tálim alady. «Bádrısapa» bı toby, vokal synyby, dombyrashylar ansambli de osynda. Búginde esimderi elimizge tanylǵan birsypyra talantty jas osy «О́ner stýdııasynyń» túlekteri.
Syrt qaraǵan kisige sýyqtaý kórinetin Ásııa apamyzdyń ishki jan dúnıesine úńilip kórgen adam kerim bir jylylyq pen náziktikti, túzý adamǵa tán berik ustanymdy, elge janashyr azamattyqty birden ańǵarady. Aqynnyń bul qasıeti qaǵazǵa ádiptelgen jazba óleńderinde kózge uryp tur.
Ne bitirdim, tyndyrdym, sirá, neni,
Syn sadaqqa ilgeli el myna meni,
Aq tolqynǵa orap ap jyr teńizi,
Gúldetkeli sózimdi qula beli?
...Tórelerdiń shyqsam da jıi esinen,
Tól ónerdiń kúsh alam ıesinen.
Tóbedegi qamshysyn úıirgende,
Tómendegi el qorǵaıdy kıesimen.
Ásııa apamyzdyń eskerilmeı, elenbaı jatqan bir dúnıesi osy jazba óleńderi. Birde áli kitap bola qoımaǵan biraz óleńderin bolmaı surap edim. Elektrondy nusqada berdi. Ary-beri kóship júrgende joǵaltyp aldym. Qaıta suraýǵa dát bolmady.
«О́ner stýdııasynan» qanattanǵan ónerpazdyń biri – elge aqyndyǵymen qosa ánshi-sazgerligimen tanymal bolǵan Marǵulan Ospanov. Mektep qabyrǵasynda júrip oblystyq aıtystarǵa qatysyp júrgende Marǵulanǵa halyq aqyny Sary domalaq dep at qoıyp alǵan. Búginde biraz týyndysy úlken sahnalarda oryndalyp júrgen sazger ustazynyń birneshe óleńine án jazdy.
Jýrnalıster ustahanasy atanǵan áıgili «Qostanaı» telearnasynda jumys istep júrgende Ásııa apamyzdyń ómiri men shyǵarmashylyǵyn «Janazyq» baǵdarlamasyna arqaý etken edik. О́z arhıvimde qalǵan beınematerıaldan qıyp alyp, aqynnyń sózine jazylǵan ádemi ándi kópshilik nazaryna usynýdy jón kórdik.
Qostanaı
