– Memleket basshysynyń tapsyrmasyn jergilikti jerde júzege asyrý úshin oblystyq máslıhat sessııasynyń kún tártibine 2020-2022 jyldarǵa arnalǵan oblystyq bıýdjetti 34,8 mlrd.teńgege naqtylap otyrmyz. Aqparat retinde aıta keteıin, bul qarjynyń 25,9 mlrd teńgesi respýblıkalyq bıýdjetten bólinip otyr,– dedi oblys ákimi.
Gúlshara Naýshaqyzynyń aıtýynsha, bıýdjetten qaralǵan qarjynyń 2,6 mlrd teńgesi memlekettik ataýly áleýmettik kómek berýge, 1,5 mlrd teńge áleýmettik kepildendirilgen paketke, onyń ishinde tótenshe jaǵdaıǵa baılanysty az qamtylǵan otbasylardy azyq-túlik jáne turmystyq jıyntyqpen qamtamasyz etýge baǵyttalady. Al eńbek naryǵyn damytý, onyń ishinde jalaqyny ishinara sýbsıdııalaý, jastar praktıkasyna, "NEET" sanatyndaǵy jastarǵa, tabysy tómen kópbalaly otbasylarǵa, eńbekke qabiletti múmkindigi shekteýli jandarǵa, jańa bıznes ıdeıalarǵa beriletin granttarǵa jáne qoǵamdyq jumystarǵa 4,3 mlrd teńge qarastyrylǵan.
«2020-2021 jyldarǵa arnalǵan jumyspen qamtýdyń Jol kartasy» memlekettik baǵdarlamasyna respýblıkalyq bıýdjetten transfert retinde 9,1 mlrd teńge bólinýde. Qarjy aımaqta jańa jumys oryndaryn ashýǵa, turǵyn úı-kommýnaldyq sharýashylyǵy, ınjenerlik-kólik ınfraqurylym jobalaryn júzege asyrýǵa jáne áleýmettik-mádenı nysandardy jóndeý men eldi mekenderdi abattandyrýǵa jumsalady.
Aýyl turǵyndarynyń ómir súrý sapasyn jaqsartýǵa baǵyttalǵan «Aýyl – el besigi» baǵdarlamasy boıynsha oblysta mańyzdy sanalatyn 22 jobaǵa 3 mlrd teńge bólinedi. Sonymen qatar, «Bıznestiń jol kartasy-2025» memlekettik baǵdarlamasy sheńberinde nesıeniń paıyzdyq mólsherlemesin sýbsıdııalaý men shaǵyn jáne orta bıznes nesıelerin kepildendirýge 1,7 mlrd teńge qaralady.
Budan bólek aımaq basshysy oblystyq bıýdjet qarajatynyń jumsalý barysyna toqtalyp ótti.
– Aımaqta júzege asyrylyp jatqan qurylys, energetıka, mádenıet, sport, elektr jáne sýmen jabdyqtaý salalaryndaǵy 49 jobany qosa qarjylandyrýǵa 3 mlrd, Aral, Qazaly, Jalaǵash, Shıeli aýdandarynda turǵyn úı salýǵa qundy qaǵazdardy shyǵarý esebinen 895,5 mln teńge bólinetin bolady. Sonymen qatar, bilim, densaýlyq, mádenıet jáne sport salalaryna 516 mln.teńge qaralady. Al quqyq qorǵaý organdarynyń materıaldyq-tehnıkalyq bazasyn nyǵaıtýǵa 219 mln teńge jumsalady,- dedi G.Ábdiqalyqova.
