Alaıda TJ mamandary tasqynnyń ekinshi tolqyny kele jatqanyn aıtyp, qaýiptiń seıilmegenin halyqqa jetkizýde. Onyń negizgi sebebi Esildiń ońtústiktegi, ıaǵnı Aqmola oblysyndaǵy keıbir saǵalarynyń mol sýly bolyp, qazir negizgi arterııaǵa quıylyp jatqandyǵynan bolyp otyr eken. Sonyń ishinde Jabaı, Kolýton ózenderiniń sýlary Esildiń arnasyn ájeptáýir kóterýde. Derjavınskidegi gıdrobekettiń málimdeýine qaraǵanda olardyń sýy Esildiń arnasyn 79 sm-ge deıin kótergen, alaıda bul sý Soltústikke eki táýlikte jetip, aǵyn saıabyrlaıdy. Biraq ol báribir iz-tuzsyz aıaqtalmaıdy eken.
Soltústik Qazaqstan oblystyq TJ departamentiniń bastyǵy, polkovnık Ramıl Kamalov jýrnalısterge brıfıng berip, osy ekinshi tolqynnyń qanshalyqty zardap ákelýi múmkin ekendigin jáne qazirgi jaǵdaı týraly aıtyp berdi. Ekinshi tolqyn Petropavl qalasynyń mańyndaǵy Zarechnyı kenti men Qyzyljar aýdanynyń Prıbrejnoe jáne Teplıchnoe aýyldaryna qıyndyq ákelýi múmkin eken. Bul qalyptaǵy maýsymdyq jaǵdaı, dál osy eldimekenderge Esil tasyǵanda jyl saıyn qaýip tónedi. Alaıda bıyl sý kólemi jyldaǵydan eki ese kóp. «Ol eldimekenderdiń tusynda jınalǵan aǵyn sýdyń kóleminen kórinýde. Alaıda jalpy jaǵdaı baqylaýda. Shekten shyqqan sý joq, biz turǵyn úılerdi sý baspaýy úshin qoldan kelgen sharalardy jasaýdamyz. Al Esildiń boıyna salynǵan saıajaılardy sý basýy qalypty jaǵdaı. Ony ıeleri jaqsy biledi. Eshkim bul prosesten qashyp qutyla almaıdy. Biz saıajaıshylardy tek qulaqtandyryp, sý kóterilgende eshkimniń úılerde bolmaýyn eskertemiz», dedi polkovnık.
Esildiń tasýy Petropavldy basyp ótetin respýblıkalyq mańyzy bar Chelıabınsk-Novosıbırsk avtojolynyń 528 jáne 529 shaqyrymynan da kórindi. Osy jáne Petropavldan Zarechnyı kentine baratyn joldardyń ústine sý shyǵyp ketken. Bul jerlerge eskertý belgileri qoıylyp, qozǵalys ýaqytsha jabyldy. Onyń ústine kezekshilik uıymdastyryldy, dedi R.Kamalov. Sonymen qatar Zarechnyı kentin azyq-túlikpen qamtamasyz etý úshin úlken avtomobılder ǵana jiberiletini belgili boldy, óıtkeni shaǵyn kólikter sý shaıǵan joldan óte almaıdy eken. Biraq turǵyndar jaıaýlar júretin kópir arqyly qalamen qatynasyp jatyr. Mundaǵy eń qaýipti ýchastok 1-shi Zarechnyı kóshesi bolyp tur. Osyndaǵy úılerge sý jetip qalýy múmkin eken, biraq ázirge ol baý-baqshalardan aspaǵan.
TJ qyzmetiniń aǵyn sýdyń alqaýyn bógeýde istegen jumystarynyń qatarynda Ramıl Kamalov ótken táýlikterde Ulttyq ulannyń kúshimen birlese otyryp, Teplıchnoe men Zarechnyı kentterin qorǵaýǵa 6 myń qapshyq ınertti materıaldar aralasqan qum bógetteri úıilgenin aıtty. Sóıtip, tasqyn turaqty baqylaýǵa alynǵan.
Osy kúnderi Petropavl qalasynyń ózi Esildiń eń joǵary kóterilý kezeńin bastan keshýde. Sońǵy úsh táýlikte onyń kóterilýi 22 sm-ge jetken. Sonymen qatar sýdyń kóterilýi Petropavlǵa jaqyn ornalasqan Báıterek, Novonıkolsk, Vodoprovodnyı aýyldarynda da baıqalady.
Sóziniń qorytyndysynda TJ departamentiniń bastyǵy jalpy jaǵdaıdyń shekten shyqpasyna senim bildirdi.
Soltústik Qazaqstan oblysy
