Shyǵys Qazaqstan oblysynyń ortalyǵynda belgisiz sarǵysh taraqandar paıda boldy. Qala dúkenderinen kezdesken osy jándikterdiń keıbiriniń uzyndyǵy besten jeti santımetrge deıin jetedi. Bul týraly «Qazaqstan» telearnasy habarlady.
Qazir bul zııankester dúkenderdi aralap qana qoımaı, kárizder men dálizderden de kórine bastapty. Jergilikti jerdegi kommýnaldyq mekeme qyzmetkerleri olardy hlormen ýlaǵanymen, esh nátıje bolmaı tur. Qaıta belgisiz sarǵysh taraqandardyń sany jyldam kóbeıip jatqan kórinedi. Sondaı-aq, deneleriniń úlkendigine qaramastan, tez qozǵala alady eken jáne qanattary bar. Alǵashynda jurtshylyq bul jándikterdi qaladaǵy ekobıoortalyqtan qashyp ketken desti. Al atalmysh mekeme dırektorynyń orynbasary Iýrıı Lýkıanestiń málimdeýinshe, ortalyqta tek madagaskar taraqany ǵana bar eken. Onyń ózi óte baıaý qozǵalady jáne barlyq talapqa saı bekitilgen akvarıýmda ómir súrýde.
Mamandar bul jemir jándikterdiń otany - Ońtústik-Shyǵys Azııa ekendigin aıtyp otyr. Olar býylyp-túıilgen taýarlarmen birge kelýi múmkin. Saǵat sanap kóbeıip kele jatqan tynymsyz iri taraqandardy 40 gradýstan asatyn Altaıdyń aıazy joımasa, ázirge eńbekkerlerdiń jumysynan nátıje bolmaı tur.
Danııar Túımebaı.
