Qazirgi tańda bar álem koronavırýs indetimen kúresýde. Tosynnan kelgen indet kezinde medısına qyzmetkerleri men dárigerler óz ómirlerin qaterge tigip, aldyńǵy shepte júr.
Italııa jáne Reseı bastaǵan álemdik aksııany otandyq sportshylar men Qazaqstan sportynyń ardagerleri de jalǵastyrdy. Olardyń qatarynda Olımpıada chempıondary men júldegerleri, álem chempıondar jáne olımpıadalyq sport túrlerinen iri halyqaralyq jarystardyń jeńimpazdary bar.
#teamKZwithYOU jobasyna elimizdegi sporttyq qoǵamdastyq atynan: Aleksandr Vınokýrov (velosport), Olga Rypakova (jeńil atletıka), Dmıtrıı Balandın (júzý), Eldos Smetov (dzıýdo), Nurbaqyt Teńizbaev (grek-rım kúresi), Iýlııa Galysheva (frıstaıl-mogýl), Marına Volnova (boks), grek-rım kúresiniń ókilderi Ashat Dilmuhamedov pen Horlan Jaqansha, dzıýdoshylar Jansaı Smaǵulov pen Erlan Serikjanov, erkin kúres sheberi Álisher Erǵalı, gımnast Narıman Kýrbanov, frıstaıl-akrobatıkadan komanda múshesi Janbota Aldabergenova, vaterpolshy Mıras Áýbákirov, taekvondoshy Smaıyl Dúısebaı, boksshylar Abylaıhan Júsipov pen Qamshybek Qońqabaev, Jámıla Baqbergenova (áıelder kúresi), short-trekshi Abzal Ájiǵalıev, karateshi Sofıa Berýlseva jáne apaly-sińlili Aleksandra jáne Ekaterına Nemıchtar (ártistik júzý) atsalysty.
Sportshylar búginginiń batyry rekord ornatyp, álemdik tuǵyrda atoı salǵan ózderi emes, adamzatty qutqarý úshin bar kúshin jumsap jatqan dárigerler ekenin aıtyp, aq halatty jandarǵa alǵys bildirdi.
