17:01
Eýropa Odaǵy ekonomıkany qalpyna keltirý úshin trıllıon qoryn qurmaq
EO kóshbasshylary beıne baılanys arqyly pandemııamen kúreske arnalǵan sammıt ótkizdi. Olar koronavırýs indetinen asa zardap shekken elderge jáne eýropalyq kompanııalarǵa kómek kórsetý úshin arnaıy qor qurýǵa sheshim qabyldady.
Qor aldaǵy eki aı ishinde qurylýy kerek. EO-da shamamen 1,5 trln eýro jınalady dep úmittenedi. Osylaısha, 1 maýsymǵa qaraı kásipkerler men jumysshylarǵa kómek kórsetý úshin 540 mlrd eýro somasyna nesıe paketi daıyn bolady.
15:50
Reseıde ótken táýlikte COVID-19 vırýsyn juqtyrǵan taǵy 5 849 adam tirkeldi
Olardyń 46,1%-ynda aýrýdyń esh klınıkalyq belgileri baıqalmaǵan. Elde jaqynda 60 adam kóz jumyp, 677 naýqas jazylyp shyqty.
Reseıde barlyǵy 68 622 vırýs juqtyrǵan naýqas anyqtalǵan.
Ýkraınada koronavırýs ınfeksııasyn 477 adamnyń juqtyrǵany anyqtaldy
Qazirgi Ýkraınada barlyǵy 7 647 adamnyń vırýs juqtyrǵany anyqtalǵan. Buǵan qosa, elde taǵy 97 adam aýrýynan aıyqty. Koronavırýsty jeńip, saýyǵyp shyqqandardyń jalpy sany 601-ge jetti.
Italııada 2 646 adam vırýs juqtyrdy
Italııada vırýs juqtyrǵandardyń jalpy sany 189 973-ke jetti. COVID-19-dan sońǵy derekter boıynsha taǵy 464 adam kóz jumǵan. Jalpy qaıtys bolǵandar sany — 25 549. Jazylyp shyqqandar sany 57 576 adamǵa jetti. Koronavırýsty anyqtaýǵa 66 000-ǵa jýyq test jasaldy.
AQSh-ta COVID-19 juqtyrǵandar sany 869 myńnan asty
Koronavırýs ınfeksııasynan 47,8 myńnan astam adam kóz jumǵan. AQSh-ta sońǵy 10 kúnde qaıtys bolǵan adamdar sany 2 esege artty. 84,1 myń adam aýrýynan aıyǵyp shyqty.
Belarýste vırýs juqtyrǵan taǵy 741 adam tirkeldi
Bul elde barlyǵy 8 022 adam qaýipti vırýs juqtyrǵan. Buǵan qosa, jaqynda taǵy 2 adam kóz jumdy. Jalpy 60 naýqas koronavırýstan qaıtys boldy.
Qytaıda ótken táýlikte COVID-19-dy alty adam juqtyrǵan, ólim-jitim tirkelgen joq
12:10
Álemde Ramazan aıy qalaı bastaldy?
Búgin dúnıejúzindegi musylman qaýymy úshin qasıetti Ramazan aıy bastaldy. Álemdi jaılaǵan pandemııamen tuspa-tus kelgen bıylǵy Ramazan túrli elde qalaı bastaldy?
Túrkııa koronavırýstyń taralýyn toqtatý úshin 31 provınsııasynda tórt kúndik shekteý jarııalady.
Halyq kóp jınalatyn dinı sharalar bolmaıdy jáne aýyzasharǵa arnalǵan arnaıy oryndar da jabyq bolady.
Naýbaıhanalar aýyzashar aldynda eki saǵat buryn nan satýdy toqtatady. Bul - adamdardyń kóp shoǵyrlanýyn boldyrmaýdyń amaly, sebebi oraza ustaýshylar arasynda ulttyq nan asa tanymal. Aýyzashar ýaqytynan keıin ári qaraı jumysyn jalǵastyra beredi.
Bazarlarda adamdardyń ara qashyqtyq saqtaýy jáne maska taǵýy qadaǵalanady.
Meshitter jabyq, el bıligi qulshylyqty úıde otbasymen jasaýǵa shaqyrdy.
Indonezııa provınsııalar arasynda asa qajet emes saparlardy shektedi.
Elde áýe reısteri 1 maýsymǵa deıin, al teńiz saıahaty 8 maýsymǵa deıin toqtatylǵan.
Ramazannyń alǵashqy kúnindegi qulshylyq/ Medan qalasy, Soltústik Sýmatra provınsııasy
Egıpette engizilgen qatań sharalar Ramazan aıymen báseńdeı bastaıdy. Keıbir bıznester qaıta ashylýǵa ruqsat aldy. Túngi komendanttyq saǵat ýaqyty da qysqardy.
Saýda ortalyqtary men ózge bıznester demalys kúnderi ashylady, biraq keshki saǵat 5-te jabylýy kerek.
Meshitter jabyq jáne barlyq dinı jıyndarǵa tyıym salynǵan.
Birikken Arab Ámirlikteri jalpyulttyq komendanttyq saǵatty eki saǵatqa qysqartty.
26 naýryzdan bastap táýlik boıy komendanttyq saǵat engizilgen Dýbaıda bılik komendanttyq saǵatty tańǵy 6-dan keshki 10-ǵa deıin toqtatqanyn málimdedi.
Dýbaıda dámhanalar men meıramhanalarǵa jumys isteýge ruqsat etildi, al saýda ortalyqtary tústen keshki 10-ǵa deıin ashyq bolady.
Qoǵamdyq kólik qyzmetteri jeksenbi kúni qaıta iske qosylady, biraq jumysqa shyqqan qyzmetkerlerdiń 30 paıyzy kún saıyn dene qyzýyn ólshep turýy kerek.
Meshitter, kınoteatrlar men balalar alańdary ázirge jabyq.
Aljır túngi komendanttyq saǵatty qysqartatyn boldy. Odan bólek tolyǵymen jabyq bolǵan el astanasyna jaqyn mańdaǵy provınsııa keıbir shekteýlermen qaıta ashylady. Bul týraly keshe beısenbide premer-mınıstrdiń keńsesi habarlady.
11:13
Ispanııa karantın rejımin báseńdetýdi josparlap otyr
Keshe elde koronavırýs ınfeksııasynan taǵy 440 naýqas qaıtys boldy, bul odan aldyńǵy táýlikte qaıtys bolǵandardyń sanynan kóp. Taǵy 4 635 adamnyń vırýs juqtyrǵany anyqtaldy.
Jalpy alǵanda, Ispanııadaǵy koronavırýstan kóz jumǵandar sany 22 myń adamnan asty.
Degenmen Ispanııada indettiń taralýy báseńdep keledi. El úkimeti karantın rejımin mamyr aıynyń ortasynan bastap álsiretýdi josparlap otyr.
14 jasqa tolmaǵan balalarǵa osy jeksenbi kúni dalada serýendeýge ruqsat etiledi. Buǵan deıin olarǵa úıden shyǵýǵa tyıym salynǵan edi.
10:23
Ońtústik Koreıada ótken táýlikte alty adamnyń vırýs juqtyrǵany, 90 adamnyń saýyǵyp shyqqany belgili boldy
Qaıtys bolǵandar sany ósken joq, balyǵy 240 adam. Elde vırýs juqtyrǵandardyń jalpy sany 10 708-ge deıin ósti, barlyǵy 8 501 adam jazylyp shyqty.
Koronavırýs juqtyrǵan adamdar sanynyń el ishinde azaıýyna baılanysty bılik jeńildetilgen áleýmettik qashyqtyqty saqtaý rejımin 5 mamyrǵa deıin uzartty.
Saıabaqtar, tabıǵatta demalý oryndary qaıta ashylady, sport, din jáne oıyn-saýyq nysandary shekteýli túrde qyzmetin qaıta jalǵastyrady. El bıligi azamattardan burynǵysynsha halyq kóp jınalatyn jerlerge barmaýdy, úıden sebepsiz shyqpaýdy, aldyn alý sharalaryn saqtaýdy surady.
Ońtústik Koreıa Úkimeti barlyq azamattarǵa koronavırýsqa baılanysty materıaldyq kómek kórsetetinin jarııalady.
10:02
Dúnıejúzinde koronavırýs ınfeksııasyn juqtyrǵan 2 708 885 adam tirkelgen.
Qaıtys bolǵandar sany 190 858 adam, jazylyp shyqqandar 738 486 adam.
