Batys Qazaqstan oblysynda kúni búginge deıin koronavırýs ınfeksııasyn juqtyrǵan 120 oqıǵa tirkeldi. Olardyń bári de ınfeksııalyq stasıonarda em-dom aldy, 7 adam jazylyp shyqqan. Bolatbek Amangeldiulynyń aıtýynsha, vırýs juqtyrǵandardyń biri – kámeletke tolmaǵan jas bala.
- Dál qazir Oralda 113 adam stasıonarlyq em-dom alyp jatyr, onyń ishinde 79-y – aýrýdyń jeńil túrimen, 33-i – ortasha túrimen aýyrǵan. 4 adamǵa pnevmonııa dıagnozy qoıyldy, biraq tynys alýy asqynbaǵan. Bir áıel ǵana ıntensıvti terapııanyń jansaqtaý bóliminde jatyr. Biraq ol naýqastyń da dene qyzýy tústi, jaqyn kúnderi jalpy palataǵa aýystyrylady. Jasandy tynys aldyrý apparatyna qosylǵan naýqas joq. Dárigerlerdiń janqııarlyq eńbegi arqasynda bul ınfeksııanyń betin qaıtaryp, adamdardy bar kúsh-jigerdi salyp emdep jatyrmyz. О́kinishke qaraı, indetpen kúreste alǵy shepte júrip, vırýs juqtyryp alǵan áriptesterimiz de bar, - dedi Bolatbek Qaıýpov.
Budan buryn habarlanǵandaı, Batys Qazaqstan oblysynyń memlekettik bas sanıtarlyq dárigeriniń qaýlysymen óńirde kúsheıtilgen karantın rejimi kúshine engen. Bul boıynsha Reseı Federasııasymen aradaǵy shekaradan ótken azamattar oqshaýlanyp, naýqaspen qarym-qatynasta bolǵandardyń bári 14 kúndik karantınde boldy. Árıne, mundaı qatań sharalarǵa narazy bolǵandar da kezdesti. Keıbireýler karantınde adamdarǵa jaıly jaǵdaı jasalmaǵanyna shaǵymdanǵan bolatyn.
- Aıta keteıin, karantındik stasıonar – medısınalyq mekeme bolýy mindetti emes. Ol jerde oqshaýlaný rejimi, jatyn orny jáne tamaqtaný orny bolsa jetkilikti. Munyń barlyq shyǵyny medısınalyq mekemeniń esebinen júrgizilýde. Ol stasıonarlar barlyq medısınalyq personalmen qamtylǵan. Qajetti barlyq dári-dármek, qural-jabdyq jetkilikti. Palatada jeke gıgıenalyq zattar, sabyn, qaǵaz súlgi bar. Pasıentterdiń bári bir kıetin betperdemen qamtylǵan. Ras, ol jerde komfort az, biraq biz ol jerde jatqan jerlesterimizge, basqa oblys turǵyndaryna ýaqytsha qıyndyqqa sabyrly bolýyn suraımyz. О́ıtkeni bul sharalardyń bári sizderdiń ózderińizdiń jáne jaqyn-jýyqtaryńyzdyń densaýlyǵy úshin jasalyp otyr, - dedi densaýlyq saqtaý basqarmasynyń basshysy.
Bolatbek Qaıýpov tótenshe jaǵdaı kezeńinde dárigerlerdiń eń basty mindeti – koronavırýske shaldyqqan naýqastardy bastapqy kezeńinde emdeý ekenin aıtty. Bul qaterli indetti asqyndyrmaı, aýyr saldarynyń aldyn alý úshin kerek.
Batys Qazaqstan oblysynyń dárigerleri osy kezge deıin ár jaqtan kelgen 16 myń adamdy aldynan ótkerip, monıtorıng jasapty. 1,5 myńnan astam adam karantındik jáne provızorlyq stasıonarlyq oqshaýlaý sharasynan ótken. Polımerlik tizbekti reaksııa arqyly 5 myńnan asa dıagnostıkalyq zertteý júrgizilgen.
- Jazylyp shyqqan adamdardyń jaǵdaıy jaqsy, kún saıyn habarlasyp, jaǵdaıyn baqylap otyrmyz, - deıdi Bolatbek Qaıýpov.
Batys Qazaqstan
