Taraz qalasyna qarasty «Shóldala» aýylynyń, qaladaǵy «Qarasý» shaǵynaýdanynyń jáne Taraz qalasy, Tóle bı kóshesindegi jataqhananyń turǵyndaryna ákimniń atynan azyq-túlik taratyldy. Búgingideı karantın kezinde úıde otyrýǵa májbúr bolǵan muqtaj otbasylarǵa arnap aýyzashar uıymdastyrý týraly ákimniń bastamasyna oblys ákiminiń orynbasarlary, máslıhat depýtattary jáne tanymal kásipkerler qoldaý bildirdi. Al, óńir basshylyǵynyń azyq-túlik sebetterin alǵan turǵyndar on eki aıdyń sultany – Ramazan aıynda jasalǵan bul saýapty iske alǵystaryn jetkizdi.
Qazaqstan musylmandary dinı basqarmasynyń Jambyl oblysy boıynsha ókil ımamy, oblystyq ortalyq «Hıbatýlla Tarazı» meshitiniń bas ımamy Beıbit qajy Myrzageldıev karantın jaǵdaıyna baılanysty aýyzashar uıymdastyrý kezinde barlyq sanıtarlyq-epıdemıologııalyq talaptardyń saqtalǵanyn aıtty. Sonymen qatar, árbir azamat úshin aýyzashardyń as máziri aldyn ala daıyndalyp, turǵyndarǵa azyq-túlikti oblystyq meshittiń qyzmetkerleri men eriktiler árqaısysynyń úılerine jetkizip bergen. Oblystyń bas ımamynyń aıtýynsha, bıyl qasıetti aıdyń bastalýyn asyǵa kútken barlyq musylmandar taraýıh namazyn úıde oqyp, karantın talaptaryn saqtaı alady. Sondaı-aq, ımam balalardy tárbıeleýge kóńil bólip, árbir adam óz amaldary men áreketterine esep berip, qaıyrymdylyqpen aınalysqandarynyń abzal ekenin de aıtty. Al, oraza ustaǵan barlyq azamat oblystyq, qalalyq jáne aýdandyq meshitterdegi ashanalar men kafelerdegi tamaqqa tapsyrys berip, úıge aldyrý arqyly aýyz asha alady.
Jambyl oblysy
