Karantın týraly: Qazirgi tańda velosportshylardy tasjolǵa jibermeıdi. О́ıtkeni karantın kezinde úıden shyqpaý qajet. Eýropa elderi jabyq, sondyqtan bári de úıde jattyǵýda. Degenmen muny jattyǵý dep aıtý qıyn, formasyn saqtaýda desek durys bolatyn shyǵar. Barlyǵy mamyr aıyn kútýde. Olardyń qatarynda biz de barmyz. Bizdiń sportshylarǵa jolda daıyndalý úshin múmkindik berip qalar. Bul úlken demeý bolar edi.
Olımpıadanyń keler jylǵa aýysýy: HOK pen uıymdastyrý komıteti durys sheshim qabyldady. Qazir veloshabandozdar ártúrli jaǵdaıda jattyǵýda. Belgııa, Aýstrııa syndy elderde jolda daıyndalýǵa ruqsat bar, al kópshiliginde mundaı múmkindik joq. Al keıbireýleri bazada oqshaýlaý rejiminde jatyr dep estımin. Sondyqtan, Olımpıadanyń aýystyrylǵany eń jaqsy sheshim boldy. Olımpıadaǵa alǵan joldama kúshin joımaıdy, saqtalady. Bizdiń komandanyń úzdigi – Alekseı Lýsenko. Oǵan kómekshilerdi tańdaıtyn bolamyz. Bul jumysty kelesi jylǵa qaldyryp otyrmyz.
Komanda quramy týraly: Komandany jyl basynda jasaqtadyq. Árbir veloshabandoz qaı jarysqa qatysatynyn bildi, soǵan oraı daıyndaldy. Qazir jarys ótetin merzim sát saıyn aýysyp jatyr. Mamyr aıynda ótetin «Djıro» qazanǵa qaldy. Komandanyń negizgi sportshylary qatarda, áli oılanamyz. Osy maýsymda Lopesti baıqaǵymyz kep tur. Al «Týr de Frans» bıyl qıyndaý. Nıssada bastalǵan soń birden taýly kezeńder bastalyp ketedi. Jarys kezinde birtindep kúsh alý úshin ýaqyt berilmeıdi. Sol Fýlsang pen Lýsenkonyń kúshine senemiz.
Qazaqstandaǵy velosporttyń damýy: Bizde jaqsy balalar bar. Bir komandada toǵyz-on sportshy kózge túsedi. Sondaı-aq jastar da qatarǵa qosylýda. Bizge bıyldan bastap Pronskıı qosyldy. Jas ári ambısııasy myqty jigit. Ol qurlyqtyq komandada júrgende baqylap, byltyrdan beri nazarda ustadyq. Jas sportshylar kásibıler arasynda beıimdelý úshin olarǵa ýaqyt berip, biraz shyńdaý qajet. Bizde alǵa ilgerileý bar. Biraq másele de joq emes. Qurlyqtyq komandalardyń kóp bolǵanyn, sportshylarda tańdaý múmkindigi bolǵanyn qalaımyz.
Olımpıada altyny týraly: Meni top jarady dep eshkim kútken joq, biraq men kúreske daıyn boldym. Saraptap qaraıtyn bolsaq, jeńiske jetetin múmkindik az edi. Ár elden bes sportshydan synǵa tústi, al biz Asan Bazaev ekeýmiz ǵana bardyq. Márege bes shaqyrym qalǵanda Ýran ekeýmizdiń altynǵa talasatynymyz anyqtaldy. Qýyp kele jatqan negizgi toptan alshaqtaý úshin bar kúshińdi salasyń, sondaǵy artyq ýaqytty únemdep, bir shaqyrym úshin jantalasqanda barlyǵyn salqynqandy oılastyrý qajet. Sondyqtan Tokıoda top jarý Alekseıdiń qolynan keledi dep senemin. Sportshylar taýdaǵy kezeńniń kóptigine baılanysty Tokıo oıyndary qıyn bolady dep boljaýda. Al Lýsenko taýda jaqsy júredi.
Jazyp alǵan
Álı BITО́RE,
«Egemen Qazaqstan»
