Tabıǵat baılyǵyna qastandyq jasaǵany týraly beınesıýjet áleýmettik jelilerge jarııalanǵan sátte Taraz qalasynyń ákimi Aıtqazy Qarabalaev qaladaǵy S.Seıfýllın kóshesine jetti. Ol tıisti mekeme basshylaryna taldardy aıaýsyz otaǵandarǵa is qozǵaýǵa tapsyrma berdi.
Anyqtalǵandaı, «Talas» móltekaýdany №17 úıdiń janyndaǵy qaýipti 27 aǵashty jasartý maqsatynda olardyń tóbelerin qysqartýǵa ákimdiktiń turǵyn-jaı kommýnaldyq sharýashylyq bólimi tarapynan aǵymdaǵy jylǵy 20 naýryz kúni ruqsat berilgen eken. Alaıda, kásipker talapty oryndamaı, aǵashtardy túbinen otap tastaǵan. Qazirgi tańda quzyrly organdar tarapynan kásipkerdiń isine qatysty qylmystyq is qozǵaldy.
Búginde Jergilikti polısııa qyzmeti men orman sharýashylyǵy mamandary keltirilgen zalal mólsherin anyqtaýda. Al, kásipkerge keltirilgen zalal úshin 100 aılyq eseptik kórsetkish kóleminde aıyppul salynyp, qylmystyq is qozǵaldy. Sondaı-aq, Tarazdaǵy Abaı dańǵyly men Tashkent kóshesiniń qıylysyndaǵy «Golpass» meıramhanasy aldyndaǵy kesilgen aǵashqa baılanysty qala ákimi Aıtqazy Qarabalaev barlyq quzyrly organ mamandaryn kórsetilgen mekenjaıǵa jınap, aǵashty keskenderdi taýyp, ákimshilik jaýapkershilikke tartýdy tapsyrdy. Atap ótsek, qalanyń basty kósheleriniń biri bolyp sanalatyn bul kóshedegi taldy túbinen kesýge ákimdik tarapynan eshqandaı da ruqsat berilmegen. Atalǵan meıramhana qyzmetkerleriniń aıtýynsha, alǵashqyda áldekimder aǵashty ortasynan, birneshe kúnnen keıin túnde túbinen kesip, butalaryn osy jerge tastap ketken. Kóshe boıynda shashylǵan butaqtardy aldaǵy kúni «Jasyl El-Taraz» JShS-niń qoǵamdyq jumysshylary shyǵarǵan.Qazirgi tańda bul másele boıynsha quzyrly organdar is qozǵap, tergeý amaldary júrgizilýde. Taraz qalalyq ákimdiginiń málimetinshe, qalaı bolǵanda da jasyl jelekti quzyrly organnyń ruqsatynsyz, orynsyz otap, keskender qatań jazaǵa tartylady.
Sondaı-aq, ákimdik bul máselege qatysty eshkimniń de jazadan qutylmaıtynyn málimdedi.
