Aqtaý qalasynyń qart turǵyny Temırbaev Petr Nıkolaevıch Altaı ólkesiniń Nıkolaevka aýylynda dúnıege kelgen. Soǵys kezindegi óz quralpy jasóspirimder sekildi ol da buǵanasy qatpaı turyp-aq aýyr eńbekke aralasty, Jeńisti jaqyndatýǵa óz úlesin eńbek maıdanynda qosty.
Soǵystan soń ol Týla oblysyndaǵy túrmede qyzmet atqardy. 1956 jyly Vılnıýs qalasynan IIM bastaýysh quramyna daıyndyq mektebin bitirip, 1964 jyly IIM Joǵary mektebin bitirdi. Ártúrli qyzmetter atqarǵan P.Temırbaev 1986 jyly Mańǵyshlaq oblystyq GM-172/5 mekemesi bastyǵynyń orynbasary bolyp qyzmet atqaryp júrip ishki ister qyzmetiniń polkovnıgi shenimen eńbek demalysyna shyqty.
2018 jyly oblystyq Ishki ister departamenti jáne Ulttyq gvardııa ardagerler keńesiniń sheshimimen «Ishki ister departamentiniń qurmetti ardageri» ataǵymen marapattaldy.
-Petr Nıkolaevıch bizdiń qyzmetkerlerimizge árdaıym batyldyqtyń úlgisi bolyp keledi. Biz oǵan árdaıym merekemen jáne týǵan kúnimen quttyqtaýǵa qýana kelemiz. Onyń ómiri – kópke úlgi. Biz ardagerge myqty densaýlyq pen uzaq ómir tileımiz, delingen vedomstvo bergen habarlamada.
