Árıne, bul úshin eń aldymen kásipkerlik salasy jandanýy tıis. Qyzylorda oblysynyń Qarmaqshy aýdanynda tirkelgen 3 206 kásipkerlik nysanynyń 90,5 paıyzy jumys istep tur. О́ńirdiń negizgi baǵyty aýyl sharýashylyǵy salasy bolǵandyqtan qazir munda agroónerkásiptik keshendi damytýǵa basymdyq berilip otyr.
Qazir aýdanda eginmen qatar tórt túlikti túletip otyrǵandar da kóp. Osynyń arqasynda sala tabysy mal sharýashylyǵy ónimderiniń esebinen artýy baıqalady.
Bıyl qarmaqshylyq dıqandar 22920 gektarǵa egis egýdi josparlasa, sonyń 13170 gektary kúrish. Bıdaı 667, arpa 150, maqsary 352, soıa kólemi 170 gektar bolmaq. Mal azyǵyndyq daqyldar 6900, júgeri 200 gektarǵa egiledi. Qazir bıdaı, arpa, maqsary, jońyshqa egý tolyq aıaqtaldy. Odan bólek T.Kómekbaev aýyldyq okrýginde nasos kómegimen sýarylatyn 5 gektar, Aldashbaı ahýn aýyldyq okrýginde jabyndy astyna egilgen 13 gektar baqsha, kókónis daqyldary kútimge alyndy.
Bıyl aýdandaǵy taǵy bir jańalyq – eldi meken turǵyndarynyń azyq-túlik qoryn qalyptastyrý úshin jalpy kólemi 1307 gektar alqapqa kartop, kókónis jáne baqsha daqyldaryn egý mejelenip otyr. Osyǵan baılanysty aýdan ákimdigi bastamasymen barlyq eldimekende turǵyndar baqsha egetin alqaptardy ınvestorlar daıyndap berdi. Qazir aýyldarda jappaı baqsha egý bastaldy. Keıbir ónimderdiń sapaly tuqymdary syrt óńirlerden ákelindi.
Ázirshe aýdanǵa kókónis ónimderi ońtústik óńirlerden tasymaldanýda. Erteń kúzde qarmaqshylyqtar dastarhanǵa ózderi ekken ónim túrlerin qoıa bastaıdy.
Ár aýyldyń irgesindegi baqshalyqtardyń aıaq sýmen qamtylýy aýdan ákimdiginiń nazarynda bolady. Osyǵan baılanysty keshe aýdan ákimi Musa Qaldarbekov sý tospalary men arnalar jaǵdaıymen tanysty.
Josaly kentinen 65 shaqyrym qashyqtyqta ornalasqan «General», «Toǵyzqudyq - Áltaı» jáne «Qashqansý» kólderinde bolyp, mamandarmen sýdy egistikke paıdalanýdyń joldaryn talqylady. Sapar aıasynda «Qojantaı» sý tospasynyń jaı-kúıimen tanysty.
- Egistikpen qatar shabyndyqtardyń da sýarylýyn nazardan tys qaldyrýǵa bolmaıdy. Bizdiń aýdan úshin sý máselesi basty másele bolǵandyqtan tospalardyń jaǵdaıy men kanaldardyń ýaqytyly tazartylýyn qadaǵalaý kerek, – dedi aýdan basshysy.
Aýdandaǵy egin alqaptary Qýraıly, Naýryzbaı, Balajarma, Ońjaǵalaý kanaldary arqyly sýarylady. Bıyl oblystyq bıýdjetten qarjy bólinip, Qýraıly arnasynyń 22 shaqyrymy tazartylǵan bolatyn. Bul sharýashylyqtardaǵy aıaq sý máselesin jeńildetýge múmkindik beredi.
