Jasy jıyrmadan endi asqan jigit Darhan Jubanyshov qan maıdanǵa 1942 jyly qańtar aıynda ketti. Ol san ret qııan-keski urystarǵa qatysqan. Ásirese Darhannyń erlik kórsetip, atyn jaıǵan jer – Neman ózeniniń jaǵalaýy. Shyǵys Prýssııaǵa jóńkile qashyp bara jatqan nemis fashısteri Neman ózeniniń arǵy betine myqtap bekinip aldy. Olar osy jerden bir qadam sheginbeýge barlyq kúshin salyp baqty. Jubanyshov 43-shi atqyshtar polki bólimshesiniń komandıri bolatyn. Mine, osy polktyń jaýyngerleri 1944 jyldyń shilde aıynda Neman ózeni jaǵalaýyna bekingen nemis fashısterin shabýyldaýǵa kóshti.
11-armııanyń qolbasshysy Galıskıı dereý ózennen ótip, jaýǵa tutqıyldan shabýyldaýǵa buıryq beredi. Árıne, bul ólimge bas tigýmen birdeı buıryq edi. О́zenniń arǵy jaǵalaýynda árbir qalt etkendi nysanaǵa alyp jaý otyr. Boraǵan oqtyń astynda ózendi júzip ótýge kúsh-qaırat pen úlken júrek kerek. Rota komandıri barlyq jaýyngerlerdi jınap aldy. Ol tas-túıin bolyp turǵan soldattardy bir sholyp ótti. Bul jaýapty tapsyrma. Tipti basty ólimge tigý degen sóz.
«Qane, óz erkimen baratyndar bir adym alǵa shyqsyn!». Eń aldymen toptan sýyrylyp shyqqandardyń biri bizdiń keıipkerimiz Darhan Jubanyshov boldy. «1944 jyldyń 16 shildesine qaraǵan túnde erjúrek jaýyngerler qaıyqqa mindi. Darhan qol pýlemetin daıar kúıinde kezenip ustap otyr. Arǵy bette bizdiń áskerdiń de bir bóligi bar-tuǵyn. Qaıyqqa minip, arǵy betke attanǵan jaýyngerlerdiń eń jaýapty mindeti – arǵy bette qalǵan bólimshege qolmen ustap júzip ótetin arqandy jetkizý. Osy jaýapty tapsyrmany da qazaqstandyq jaýynger óz mindetine aldy.
Jaý ózen ústinde qyltyńdap kele jatqan qaıyqty baıqap qalyp, oqtyń astyna aldy. Bular da oq jaýdyra otyryp jaǵalaýǵa kelip tústi. Jaýyngerler kóp aıaldaǵan joq, bekiniste jatqan jaýǵa tap berdi. «Otan úshin alǵa!» dep bólimshe komandıri jaýyngerlerge rýh berip, shabýylǵa aldymen ózi kóterildi.
Keskilesken qoıan-qoltyq soǵys transheıa ishinde boldy. Bólimshe komandırine 1-2 nemis tap berdi. Erjúrek komandır yqqan joq. Kózdi ashyp-jumǵansha fashıstiń bireýin tapanshamen atyp óltirdi, ile-shala ekinshisin de jaıpady. Erjúrek jaýyngerler transheıany aqyry tolyq bosatyp, arttaǵy qarýlastaryna aspanǵa raketa atyp belgi berdi. Bul ózenniń arǵy betindegi jaýyngerlerge jol ashyq degen belgi.
Sol kúni kúndiz az ǵana jaýynger jaý áskeriniń tórt shabýylyn toıtardy. Sóıtip qazaqtyń arda uly Darhan Jubanyshov bastaǵan jaýyngerler negizgi kúshtiń Neman ózeninen ótýine múmkinshilik týǵyzdy. Lıtva jerinde kórsetken osy qaharmandyǵy úshin gvardııa kishi serjanty D.Jubanyshov Qyzyl Tý ordenimen marapattaldy.
Munan soń da batyr jaýynger talaı soǵysqa qatysyp erlik kórsetti. Biraq Darhan Jeńis jalaýynyń Berlınde jelbirep, dúnıe júziniń shat-shadymanǵa bólengen sátin kóre almady. Ol Kenıgsberg qalasyna shabýyl jasaǵan urysta erlikpen qaza tapty.
Biz batyr týraly osy derekterdi qaıdan aldyq dersiz? Soǵystan keıin kóp jyl ótken soń lıtvalyq Povılos Fralovas esimdi azamat jerlesimiz týraly ózi biletin jaıttardyń bárin qaǵazǵa túsirip, hat joldady. Hatta joǵaryda aıtylǵan derekterdi aıta kelip, «Biz batyrdyń týyp-ósken jerin de anyqtadyq. Ol Qyzylorda oblysy Aral aýdany Sarbasat aýyldyq keńesiniń azamaty eken. Ol jerde batyrdyń anasy Úmitken Berbaeva apaı turady. Biz osyndaı batyr tárbıelegen anaǵa alǵys aıtamyz. Povılos Fralovas. Lıtva SSR» dep aıaqtaǵan.
Búginde Aral aýdany Sekseýil aýylyndaǵy orta mektepke Darhan Jubanyshovtyń esimi berilgen. Aýylda batyr atyndaǵy kóshe de bar. Degenmen, jerlesimizdiń erlik isterin el sanasynda jańǵyrtyp, urpaqtarǵa úlgi etý batyr týraly basqa da derekter izdestirilip, zerttelýi kerek dep sanaımyz. Osyndaı erlerimizdi este saqtaý keleshek urpaqqa amanat. Erlerimizdi ardaqtaý bizge – keıingi urpaqqa mindet.
