Aımaqtar • 09 Mamyr, 2020

Almaty HQO-lary endi múlde jańa formatta qyzmet kórsete bastaıdy

307 ret kórsetildi

Almatyda mamyr merekelerinen keıin Halyqqa qyzmet kórsetý ortalyqtary ashylady. Alaıda, HQO endi burynǵydaı jumys istemeıtini qazirdiń ózinde belgili boldy.

HQKO jumysy qalaı ózgeredi, qazirgi ýaqytta jańa formatqa kóshý boıynsha qandaı daıyndyq sharalary júrgizilip jatyr, azamattar neni bilýi tıis? Osy jáne HQO-nyń jańa jumys formaty týraly «Azamattarǵa arnalǵan úkimet» MK KEAQ Almaty qalasy fılıalynyń dırektory Danııar Qyryqbaev baıandaıdy.

– Danııar Batanuly, Almaty qalasynyń Halyqqa qyzmet kórsetý ortalyqtary tótenshe jaǵdaı rejıminen keıingi qyzmetinde qandaı naqty ózgerister júredi?

– Almaty qalasynyń Halyqqa qyzmet kórsetý ortalyqtary Tótenshe jaǵdaı rejımi aıaqtalǵan soń jumys isteıdi.  Alaıda, vırýstyń taralý qaýpi men turǵyndardyń ómiri men densaýlyǵyna alańdaýshylyqtyń saqtalýyna baılanysty halyqqa qyzmet kórsetý ortalyqtarynyń jumys tártibin ózgertý týraly sheshim qabyldanǵan bolatyn.

О́zgerister HQKO-da kórsetiletin memlekettik qyzmet túrlerine ǵana emes, olardy usyný formatyna da qatysty bolady. Eger ret-retimen aıtar bolsam, birinshiden, endi almatylyqtar HQO-da elektrondy formatta qoljetimsiz, tek «qaǵaz» júzinde kórsetiletin qyzmetter (mysaly, jeke kýálikti, tólqujatty aýystyrý,  zeınetaqy tólemderin taǵaıyndaý),  men egov.kz arqyly rásimdelgen ótinishterdiń nátıjesin alý úshin ǵana kele alady. Ekinshiden, endi HQO-ǵa barý úshin 1414 baılanys ortalyǵy nemese nemese egov.kz saıtyndaǵy arnaıy servıs arqyly kezek ýaqytyn aldyna ala brondaý qajet bolady.

Azamattar elektrondy formatqa aýdarylǵan jáne egov.kz portalynda qoljetimdi barlyq memlekettik qyzmettiń 80%-dan astamyn burynǵydaı HQO ǵımarattarynda emes, tek ózdiginen nemese ákimdikter janyndaǵy keńselerde, oqý oryndarynda, medısınalyq uıymdarda men basqa jerde ornalastyrylatyn ózine-ózi qyzmet kórsetý sektorlarynda ala alady.

Qazirgi kúni ondaı mekemelermen kelissózder júrgizilip, óz-ózine qyzmet kórsetý sektorlaryn ashý jumystarymen aınalysýdamyz. Sonymen qatar, burynǵydaı ESQ-ny HQO-da bermeıdi, tek eGov.kz portaly arqyly alynady.

Bul azamattardyń HQO-da kóptep jınalýyn boldyrmaıdy jáne vırýsty juqtyrý qaýpin joıady, qyzmet alýshylar da óz ýaqytyn únemdeıdi.

– Memlekettik qyzmet kórsetýdiń jańa formatyna kóshýde qandaı daıyndyq jumystary júrgizilip otyr?

– Memlekettik qyzmetterdi kórsetýdiń jańa formatyna kóshý jónindegi jumystardy uıymdastyrý úshin Birqatar front ofıster jańa formatqa laıyqtalyp qaıta jańartyldy. Bólimder qajetti orgtehnıkalarmen, derbes kompıýterlermen, veb-kameralarmen, sıp-telefondarmen jáne jumysty uıymdastyrý úshin qajetti qural-saımandarmen jabdyqtaldy.

Bólimderde jınalýdy jáne tazalyq-epıdemıologııalyq rejımdi saqtaý maqsatynda qyzmet alýshylar arasyndaǵy qashyqtyqty saqtaý úshin ǵımarat kireberisine tańbalar syzyp qoıyldy.

HR-mamandary men tálimgerler beınekonferensııa baılanysy arqyly bólim mamandaryn Memlekettik qyzmet kórsetýdiń jańa formatyna (nusqaýlyqtar, Help desk jáne t.b.) oqytý júrgizdi. Bólimderdiń úzdiksiz jumysyn uıymdastyrý úshin jańa formatta kadrlardyń (mamandar, sondaı-aq basshy quram) ishki aýysýy júrgizildi.

Almaty qalasy ákimdigimen JOO ókilderin shaqyrýmen kezdesýler ótkizilip (bilim berý, densaýlyq saqtaý, TKSh jáne t.b.)HQO-larda endi ózine-ózi qyzmet kórsetý sektorlary jumys istemeıtinin, barlyq qyzmet  aldyn ala brondaý boıynsha alynatyny jáne basqasy bar. Halyqqa qyzmet kórsetý ortalyqtarynyń jańa formatyna qatysty jańalyqtary túsindirildi. Sondaı-aq Open akimat-ta, oqý oryndarynda, medısınalyq mekemeler men memlekettik mekemelerde ózine-ózi qyzmet kórsetý sektorlaryn uıymdastyrý týraly kelissózder júrgizilýde.

– Bul ózgerister Almaty qalasynyń barlyq HQO-laryna qatysty ma?

– Iá, Almatydaǵy barlyq halyqqa qyzmet kórsetý ortalyqtary kezekti aldyn ala brondaý boıynsha jumys isteıdi.

– Qalalyq «Avtosondar» qalaı jumys isteıdi?

– Bul jańa erejeler avtosondarǵa da qoldanylady.

– Oqyrmandarǵa túsinikti bolý úshin, HQO jumysynyń jańa formaty týraly tolyǵyraq aıtyp berseńiz.

– HQO-da elektrondyq qyzmet kórsetilmeıdi degen, qyzmet usyný toqtady degen sóz emes. HQO qyzmetkerleri ári qaraı qashyqtyqtan qyzmet kórsetetin bolady. Front-ofıster de jańa formatqa laıyqtalyp, modernızasııalandy. Máselen, Alataý aýdanynyń № 1 bólimi (Nurkent sh/a. 5/17) Áýezov aýdany (Jandosov kóshesi, 51), Bostandyq aýdany (Almagúl sh/a, Hojanov kóshesi, 9), Naýryzbaı aýdany (Shuǵyla sh/a. 222/5) Medeý aýdany (Markov k-si, 44), Túrksib aýdany (Rıhard Zorge k-si, 9-úı) jáne № 1 Mamandandyrylǵan HQKO(Saıaly sh/a., Aqqaınar kóshesi, 1) front-ofısteri  koll-ortalyq jáne beıneqońyraýlar qabyldaý ortalyqtary bolyp qaıta jabdyqtaldy. Olarda barlyǵy 169 jumys orny uıymdastyryldy, 50 koll-ortalyq, 119 beıneqońyraý qabyldaý operatorlary.

Elektrondyq memlekettik qyzmetterdi úıden shyqpaı alý múmkindigi joq azamattar úshin 48 jumys ornyna operatorsyz 2 sıfrlyq HQKO uıymdastyryldy.Onda kórsetiletin qyzmetti alýshylarǵa portalǵa tegin negizde kirý múmkindigimen uıymdastyrý tehnıkasy (jeke kompıýterlermen, veb-kameralarmen jáne qosalqy quraldarmen jabdyqtalǵan) usynylatyn bolady.

Bul – Almaly aýdanynyń № 1 front-ofısi (Súıinbaı dańǵyly 2, 4 korpýs) jáne Alataý aýdanynyń №2 front-ofısi. (Áıgerim sh/a., V. Benberın kóshesi, 89).

Sonymen qatar, halyqqa qolaıly bolý úshin qazirgi ýaqytta medısınalyq jáne bilim berý uıymdarynda, saýda-oıyn-saýyq ortalyqtarynda, ekinshi deńgeıdegi bankter men ózge de uıymdarda Elektrondyq úkimet portalyna kirý núktelerin ornatý máselesi pysyqtalýda. Qazirgi ýaqytta fılıal front-keńselerden tys ózine-ózi qyzmet kórsetý sektorlaryn ornalastyrý máselesin kelesi mekemelermen kelisim jasady: ákimdik janyndaǵy keńselerde, oqý oryndarynda, ekinshi deńgeıdegi bankterde, Jumyspen qamtý jáne áleýmettik baǵdarlamalar, «Nur Otan» partııasy keńselerinde, 8 saýda ortalyqtarynda, avtosalondarda, medısınalyq uıymdarda, jáne «Car city», «Nur-Sát»  sııaqty bazarlarynda.

– HQO-lardaǵy jeńildik terezelerijaıly aıtsańyz? Kimderge arnalǵan?

– Azamattardyń úsh sanaty HQO-da jeńildetilgen elektrondy qyzmet ala alady. Bul-zeınetkerler, kóp balaly otbasylar,múmkindigi shekteýli adamdar. Olar úshin árbir front-ofıste jeńildetilgen tereze jumys isteıtin bolady.

– Jeńildik terezelerinen qyzmet alatyndar da kezekti brondap kele me?

– Iá. olar  da HQO-ǵa kelmes buryn kezegin aldyn ala brondaý qajet, alaıda olar jeke kezek boıynsha ótedi.

– Danııar Batanuly, osy aldyn ala jazylý týraly egjeı-tegjeıli aıtyp berińizshi.

– HQO-na aldyn ala jazylý arqyly nemese basqasha aıtsaq brondap baryp kelý kerek. Máselen, Siz 1414 nómirine qońyraý shalasyz, operator sizdi HQO-ǵa kelý maqsatyńyzdy jazyp, ýaqyt taǵaıyndaıdy. Mundaı ádis, árıne, jaqsy emes, biraq yńǵaıly. Siz ózińizdiń naqty ýaqytyńyzdy bilesiz jáne kútip ýaqyt ketirmeısiz.

HQO-ǵa barý ýaqytyn eki jolmen brondaýǵa bolady. Birinshisi-1414 Call-ortalyǵyna habarlasý, qońyraý shalý tegin. Bul nusqa elektrondyq úkimet portalyn paıdalana almaıtyn egde adamdar úshin óte jaqsy. Aıta keteıin, mobıldi azamattar bazasynda tirkelgen telefon nómirinen qońyraý shalý kerek jáne ol  azamattyń JSN nómiri sáıkes bolýy kerek. Eger adam áli mobıldik azamattar bazasynda tirkelmegen bolsa, aldymen Call-ortalyǵynyń operatorlaryna tirkelý týraly ótinish berý kerek. Odan ári HQKO-ǵa barý ýaqyty aıtylady, telefonǵa tıisti SMS-habarlama keledi. Belgilengen ýaqytta HQKO-ǵa kelip (15 mınýtqa erte) 1414-ten kelgen SMS-habarlamany kórsetýi qajet.Bron barysynda tirkelgen JSN ıesi ǵana elektrondy kezekti paıdalana alady.

Ekinshi ádis ­– egov.kz. portalyndaǵy arnaıy servıs arqyly kezekke turý. Ol úshin Siz mobıldi azamattar bazasynda tirkelgen bolýyńyz kerek. Aldyn ala jazylý onlaın-qyzmeti telefon nómiri boıynsha SMS habarlamamen keledi. Bul úshin elektrondy-sandyq qoltańba qajet emes. Bir kezderi HQO qyzmetkerleri sizdi mobıldi bazada tirkegeni esińizde bolmasa, ony tekserý ońaı. Jaı ǵana elektrondyq úkimet portalyna kirip, «servıster» baǵanynda «azamattardyń mobıldik bazasynda tirkeýdiń bolýyn tekserý» baǵanyn tańdaısyz. Sodan keıin ózińizdiń JSN nómirińizdi engizseńiz, júıe birden nátıje beredi.

– Eger adam mobıldik azamattar bazasynda bolmasa qalaı tirkelýge bolady?

– Ol úshin adam portaldyń tómengi oń jaq buryshynda ornalasqan «Vırtýaldy assıstent» batyrmasyn basyp, qalaǵan tildi tańdaý qajet. Osydan keıin assıstenttiń tómengi panelindegi belgishege jáne «beıneqońyraý» bastyrmasyna basý kerek.

Sizge HQO operatory qońyraý shalyp, ózińizdińjeke kýáligińizdi beıne baılanys arqyly kórsetýdi, JSN, telefon nómiri men SMS-kodyn aıtýdy suraıdy. Mobıldik azamattar bazasynda sátti tirkelgennen keıin, portal betin jańartyp, JSN-di qaıta engizýińiz qajet.

 – HQO-ǵa barý úshin portalda kezekti qalaı brondaýǵa bolatynyn kórsetip beresiz be?

– Árıne. Bul boıynsha arnaıy beıne nusqaýlyq ta bar. Aldymen elektrondyq úkimet portalyna kirińiz, budan ári kelesilerdi jasaý kerek:

oń jaq joǵarǵy buryshyndaǵy «kirý» batyrmasy boıynsha ótý;

«bir rettik parol» kirýin tańdaý;

JSN engizý; telefon nómirin engizý; SMS kodyn engizý;

basty bette «HQKO kezekti brondaý» servısin tańdaý»;

JSN engizý; aımaqty tańdaý; HQO tańdaý;

barý maqsatyn tańdaý (operasııalyq zal (1 qyzmet alý), kóterme tereze (3 jáne odan kóp qyzmet), jeńildikti tereze (zeınetkerler, kóp balaly otbasylar jáne múmkindigi shekteýli tulǵalar úshin), qujattandyrý (tólqujat, jeke kýálik alý));

alý úshin qyzmetti tańdaý;

kelý kúnin tańdaý;

barý ýaqytyn tańdaý;

«Brondaý» batyrmasyn basý;

Sizge HQO-ǵa kezekti sátti brondaǵanyńyz  týraly SMS-habarlama kelip túsedi.

– Eger qyzmet alýshy bronda belgilengen ýaqytynda kele almaı, keshigip qalsa she?

– Azamattar qatań belgilengen ýaqytta kelýi tıis. Eger belgilengen ýaqyty ótip ketken bolsa, qaıtadan bron jasaýyna týra keledi. Sonymen qatar, brondy JSN-y resimdelgen azamat ǵana paıdalana alady.

Sondyqtan, eger siz týysyńyzǵa portalda aldyn ala jazýdy resimdeýge kómektesseńiz – qyzmetti ózińizge emes, sol týysyńyzdyń JSN nómirine rásimdeńiz.

– Tótenshe jaǵdaı kezinde azamattardyń  memlekettik qyzmet alýǵa qatysty máseleleri jınalyp qaldy. Qyzmet alýshylarǵa ne aıtar edińiz?

Barlyqtaryńyzdy memlekettik qyzmetterdi elektrondyq formatta alýǵa shaqyramyz. Portalda resimdeýge bolatyn barlyq qyzmetti onlaın tásilmen rásimdeńiz. Eger qıyndyq týyp jatsa, 1414 nómiri boıynsha telefon shalyńyzdar, onda  HQO operatorlary keńes beredi.

Al elektrondy formatta qol jetimdi emes «qaǵaz» qyzmetterdiń klıentteri úshin (mysaly, jeke kýálikti, pasportty aýystyrý, zeınetaqy tólemderin taǵaıyndaý), sondaı-aq  egov.kz portalynda aldyn ala resimdelgen qyzmetterdiń nátıjelerin alý úshin, qaladaǵy barlyq HQO-larǵa jáne barlyq Mamandandyrylǵan avtoHQO-larǵa, mindetti túrde aldyn-ala onlaın bron jasap, kezekti belgilegen ýaqytta kelińizder.

HQO-da qyzmet aldyn ala brondaýsyz kórsetilmeıtinin taǵy da atap ótkim keledi.

 

 

Áńgimelesken, Aınash ESALY

«Egemen Qazaqstan»

ALMATY

Sońǵy jańalyqtar

Uqsas jańalyqtar