Áýeli aýyl-eldiń amandyǵyn surastyq. Boıyna qarap edim, taralyp ósipti.
– Baıaǵy urlap jegen qııaryńnyń paıdasy-aý, – dedim men, – qaıda bara jatyrsyń?..
– Aýyldan keldim ǵoı, aǵa!
– Joq, ony aıtpaımyn, boıyń qaıda bara jatyr?
Kúmiljip qaldy.
– Qara jumys istemegesin shyǵar, balalar ósip qaldy ǵoı. Qoradaǵy birer sıyr, eki-úsh toqtyny ózderi-aq jaılaıdy. Anada aıyrdyń saby synyp qalyp, kórshilerge kúnimiz túsip júr edi, bazardan sap satyp ala keteıin dep keldim.
– Aıyrǵa sap alǵany nesi, aýyl tolǵan aǵash emes pe? О́zderiń jonyp alsańdar qaıtedi.
– Táıir-aı, ony kim jonady, aǵa? Mynda qyrǵyzdardyń jonyp qoıǵany daıyn turǵanda. Osydan-aq ala salamyz.
Osy bala, Bıjigit kishkentaı kezinde tentek boldy. Tań atqannan keshke deıin aýyldyń qotanyn ala shań qylyp ıt qýyp júretin. Bir jyly ózimizben atalas aǵaıyn kelin túsirdi. Kelin bolǵanda qandaı?! Tek orystardyń arasynda ósken soń qazaqshasy shamaly. Toı ótken soń kelesi kúni tóńirekke kóz salypty. Bizdiń aýyl kóldi jıekteı qonǵan eldi meken. Búıirde Borlyq ózeni móldirep aǵyp jatyr. Qunarly topyraǵy qandaı?! Álgi kelinniń kózi nesheme jyldan beri taý-teńiz bolyp úıilip jatqan kóńge túsipti. Bizdiń jaqtaǵy aýyldar mal qıyn jyl saıyn traktormen ysyryp, el shetine úıe beredi ǵoı. Kóń óz-ózinen jylda kúıedi. Keıin tyńaıtqyshqa aınalady. Kúnde kórip júrgendikten oǵan eshkim kóńil aýdarmaıdy. Keıin oryssha sóılegeni úshin, baqsha ekkeni úshin «orys kelin» atanǵan álgi kelinniń kózine kógiljim munar tumshalaǵan Qaraǵashtyń qalyń ormany, mólt-mólt etip jatqan Jarqamys kóli, erke ózen Borlyq túspeı, jan adamǵa keregi joq kóń túsken ǵoı. «O, boje» depti orys kelin, ne degen baılyq?! Abysyndary jas kelinniń aqyl-esiniń bútindigine kúmán keltirgen. Kóń men qıdy da kisi baılyq dep esepteıdi me eken. Jas kelin birden iske kirisken. Aramshópten basqa eshteńe óspeıtin baqshanyń ishin tazalap, bizdiń aǵaıǵa arba-arba kóń tasytyp, qııar men qyzanaq egipti. Ol kezde bizdiń aýyl qııar men qyzanaqty kórshi orys poselkesinen satyp alyp jeıtin. Tuńǵysh qadam sátti bolyp, «orys» kelinniń eńbegi jansa kerek, ónimi de joıqyn. Biraq, aýyldyń tentekteri tynyshtyq bermegen. Áli jeýge jaramaıtyn kók kezinde julyp tastaıtyn. Joq julyp tastamaıdy, jemekshi bolyp sabaǵyn shaınaıdy. Álgi tentek qaınylaryna jas kelin baqsha qaraqshylary dep at qoıypty. Árıne, oryssha. Keıin baqsha qaraqshylarynyń qoly jetpegen jerge ósken ónimdi shelek-shelek qylyp jınap, tentek qaınylaryn qaryq qylsa kerek. Sonyń biri jańaǵy Bıjigit.
Sodan beri qanshama ýaqyt ótti. Bizdiń aýyl qııar men qyzanaqqa tisin tıgizgen «orys» kelinniń isin ersi kórip, kústánalap júrgende, ol da kóship ketken. О́negesi óris jaımady. Kókónisti kógermeı jatyp jeıtin Bıjigitter qazir aıyrǵa sap izdep júr.
