Alǵashqy dáristi Shaısultan Shaıahmetov atyndaǵy «Til-qazyna» ulttyq ǵylymı-praktıkalyq ortalyǵynyń atqarýshy dırektory, fılologııa ǵylymdarynyń kandıdaty Erbol Erdembekuly Tileshov «Til úıretýdiń leksıkalyq mınımýmdarynyń qajettiligi men krıterııleri» taqyrybynda oqydy. Qazaq tilin júıesiz oqytý, leksıkalyq mınımýmnyń durys anyqtalmaýy til úırenýde qıyndyq týdyratyny jáne osy máselelerdi sheshý úshin shetel tájirıbesine súıený kerektigin baıandady. Atap aıtqanda, Ch.K.Ogdenniń «Dictionary of Basic English», A.V. Petrochenkovtiń «Aǵylshyn tiliniń negizgi 135 sózi», Erıh Vaıstyń sózdigi aǵylshyn tilin úıretýde negiz bolatynyn dáleldep aıtty. Ǵalymdardyń zertteýlerine júgine otyryp, mınımýmdardyń jasalý krıterıılerine toqtaldy.
Ekinshi dáristi fılologııa ǵylymdarynyń doktory, Nazarbaev ýnıversıteti Qazaq jáne túrkologııa departamentiniń professory Zeınehan Kúzekova «Qazaq tiliniń qoldanbaly grammatıkasynyń ádistemesi» taqyrybynda oqydy. Z. Kúzekovanyń pikirinshe, tildik bilim, tildik mádenıet, búgingi tańda tildi oqytýǵa jańasha qaraýdy talap etedi. Qazaq tilin oqytý mazmunyn pándik, prosessýaldyq, til bilimindegi qurylymdyq, qurylymdyq-semantıkalyq, fýnksıonaldyq aspektileri turǵysynan qarastyryp, leksıkalyq birlikterdi úıretýge qurylǵan jattyǵý túrlerimen tyńdaýshylardy tanystyrdy.
Búgingi oqylǵan eki dáris boıynsha til mamandary ózderine qajetti, paıdaly maǵlumat aldy degen oıdamyz.
Dáriske Zoom servısi boıynsha 71 til mamany qatysty. Feısbýk jelisindegi ONLINEda bol paraqshasy arqyly 23 adam tyńdady.
