Áńgimelesý barysynda COVID-19 pandemııasyn jáne onyń saldaryn joıý aıasynda BUU men Qazaqstannyń qabyldaǵan naqty is-sharalary talqylandy.
Qazaqstan Prezıdenti pandemııanyń ulttyq ekonomıka men densaýlyq saqtaý júıesine tıgizgen keri áserin jeńildetýge qatysty BUU Bas hatshysynyń belsendi áreketterine joǵary baǵa berdi. Qasym-Jomart Toqaev qazirgi jaǵdaıdyń jahandyq daǵdarysqa qarsy kúreste aldyńǵy shepte júrgen BUU men onyń agenttikteriniń mańyzdy ról atqaratynyn aıqyndap bergenin atap ótti. Qazaqstan halyqaralyq qaýipsizdikti nyǵaıtýǵa jáne ekonomıkany qaıta qalpyna keltirýge baǵyttalǵan BUU bastamalaryn tolyqtaı qoldaıdy.
Antonıý Gýterrısh Qasym-Jomart Toqaevqa BUU-nyń bastamalaryn qoldaǵany jáne óńirlik deńgeıdegi koronavırýsqa qarsy kúreske qosqan eleýli úlesi úshin rızashylyǵyn bildirdi. Bas hatshy azamattardyń densaýlyǵyn saqtaý, halyqtyń jaǵdaıy tómen toptaryna qarjylaı kómek kórsetý, bıznesti qoldaý jáne daǵdarystan keıingi kezeńdegi jańa ekonomıkalyq baǵytty aıqyndaý maqsatynda Qazaqstannyń qabyldaǵan sharalaryn quptady. Sonymen qatar Antonıý Gýterrısh Qazaqstannyń teńizge shyǵatyn joly joq damýshy elder tobyna tóraǵalyq etýine (2020-2021 j.j) oń baǵa berip, Qasym-Jomart Toqaevty "COVID-19 tusynda jáne odan keıingi kezeńde damýdy qarjylandyrýdyń joǵary deńgeıdegi segmenti" atty forýmǵa qatysýǵa shaqyrdy.
Atalǵan shara 28 mamyr kúni beıne konferensııa formatynda ótedi. Oǵan birqatar eldiń basshylary men kóptegen ınstıtýttardyń jetekshileri qatysady. Koronavırýs epıdemııasy jalǵasqan jaǵdaıda artta qalǵan jáne damýshy memleketterge qoldaý kórsetý máselesin talqylaý jıynnyń basty taqyryby bolmaq.
Memleket basshysy aldaǵy onlaın forýmǵa qatysýǵa kelisim berdi. Sondaı-aq álemdik qoǵamdastyqtyń tilektestik rýhy men birlesken is-qımyldary adamzattyń pandemııanyń keshendi qaýpin eńserip, BUU-nyń 2030 jylǵa deıingi ornyqty damý maqsattaryn júzege asyrýǵa múmkindik beretinine senim bildirdi.
Telefon arqyly sóılesýge BUU Bas hatshysy bastamashy boldy.
***
Teńizge shyǵatyn joly joq damýshy elder tobyna 32 memleket (Afrıkanyń 16, Azııanyń 10, onyń ishinde Ortalyq Azııanyń 5 memleketi men Aýǵanstan, Eýropanyń 4, Ońtústik Amerıkanyń 2 eli) kiredi. Qazaqstan óziniń tóraǵalyǵy aıasynda «Teńizge shyǵatyn joly joq damýshy elderdiń 2014-2024 jyldarǵa arnalǵan is-qımyldarynyń Vena baǵdarlamasyn» júzege asyrýdy maqsat etedi.
