Sapar maqsaty elimizdi BUU Qaýipsizdik Keńesiniń turaqty emes músheligine usyný máselesine arnalýda
Qazaqstan Syrtqy ister mınıstri Erlan Ydyrysov BUU Bas Assambleıasynyń 68-shi sessııasynyń turaqty damý jónindegi joǵary deńgeıli saıası forýmynyń jáne jalpy debattarynyń ashylýyna qatysty, dep habarlady QR SIM-iniń baspasóz qyzmeti.
Sapar maqsaty elimizdi BUU Qaýipsizdik Keńesiniń turaqty emes músheligine usyný máselesine arnalýda
Qazaqstan Syrtqy ister mınıstri Erlan Ydyrysov BUU Bas Assambleıasynyń 68-shi sessııasynyń turaqty damý jónindegi joǵary deńgeıli saıası forýmynyń jáne jalpy debattarynyń ashylýyna qatysty, dep habarlady QR SIM-iniń baspasóz qyzmeti.
Bas Assambleıa sessııasynyń alańynda Erlan Ydyrysov Katar Ámiri sheıh Tamım ben Hamad Ál Tanımen kezdesti. Kezdesý barysynda áńgimelesýshi taraptar ekijaqty qarym-qatynastyń keń aýqymdy máselelerin talqyǵa saldy. E.Ydyrysov eki el arasyndaǵy saýda-ekonomıkalyq áleýettiń úlken bolashaǵyn ataı otyryp, Katardy Qazaqstannyń aýylsharýashylyq, mal ósirý, munaı-gaz, taý-ken óndirisi, sonymen qatar, ınfraqurylym men kólik salalaryndaǵy ınnovasııalyq jobalaryn júzege asyrýǵa belsendi qatysýǵa shaqyrdy.
Sondaı-aq, Qazaqstan syrtqy saıasat vedomstvosynyń basshysy AQSh Memlekettik hatshysynyń birinshi orynbasary Ýılıam Bernspen kezdesý ótkizip, onyń barysynda ekijaqty qarym-qatynas, ǵalamdyq jáne aımaqtyq qaýipsizdik pen basqa da halyqaralyq qatynastardyń ózekti máselelerin talqyǵa saldy. Taraptar osy jyly iske qosylǵan AQSh – Qazaqstan ǵylymı-tehnıkalyq yntymaqtastyq jónindegi komıssııasynyń jumysyn erekshe atady.
Ý.Berns Qazaqstanǵa AQSh atynan Aýǵanstandaǵy ómirdi turaqtandyrýǵa qosqan úlesi, Irannyń ıadrolyq baǵdarlamasy jónindegi kelissózder úderisine qatysqany úshin alǵys bildirdi.
Sonymen qosa, E.Ydyrysov óziniń sheteldik áriptesterimen ekijaqty qarym-qatynastyń qazirgi jaǵdaıy men bolashaǵyn talqyǵa saldy. Atap aıtqanda, Djıbýtı Syrtqy ister mınıstri Mahmýd Alı Iýsýfpen, Gaıana Syrtqy ister mınıstri Kerolın Rodrıges-Brıkettpen, Kıpr Syrtqy ister mınıstri Ioannıs Kasýlıdıspen, Lıberııa Syrtqy ister mınıstri Avgýstın Ngafýanmen, Monako Syrtqy ister mınıstri Joze Badıamen, Týnıs Syrtqy ister mınıstri Osman Djarandımen jáne BUU BA 67-shi sessııasynyń Prezıdenti Výk Eremıchpen kelissózder júrgizdi.
Monako Syrtqy ister mınıstrimen kezdesý barysynda qazaqstandyq dıplomat Qazaqstan Prezıdentiniń osy elde bastalǵan saparyn atap ótip, tehnologııa transferti men monakalyq áriptesterdi Qazaqstannyń ınnovasııalyq bastamalaryna belsendi tartylýyna qyzyǵýshylyq tanytty. Bul jerde, eń aldymen, qurylys, qorshaǵan ortany qorǵaý, qaıta jańartylatyn energııa kózderi, týrızm, farmasevtıka, aqparattyq tehnologııalar salalaryndaǵy yntymaqtastyq máselelerine basa nazar aýdaryldy.
Ekijaqty kelissózderdiń negizgi taqyryby Qazaqstannyń kandıdatýrasyn 2017-2018 jyldary BUU Qaýipsizdik Keńesiniń turaqty emes músheligine usynýǵa baǵyttaldy. Atalǵan másele Qazaqstan syrtqy saıasatynyń eń mańyzdy maqsattarynyń biri bolyp tabylady. Qazaqstannyń BUU Qaýipsizdik Keńesindegi qyzmeti, qaýipsizdik salasyndaǵy mańyzdy sheshimder qabyldaý úderisine qatysýy jahandyq jáne aımaqtyq deńgeıde ulttyq múddelerdi eskere otyryp, álemdik saıası máselelerdi qarastyrýǵa teń dárejede qatysýǵa múmkindik beredi.
Qazaqstannyń qaýipsizdikti nyǵaıtý men turaqtandyrýdaǵy tájirıbesi, sonyń ishinde Eýropadaǵy qaýipsizdik jáne yntymaqtastyq jónindegi uıym men Islam Yntymaqtastyq Uıymyna tóraǵalyǵy sheńberinde jınaǵan tájirıbesi BUU-nyń zamanaýı syn-qaterlerine serpindi jáne saıma-saı jaýap qaıtarý kúsh-jigerine qosymsha yqpal jasar edi. Qazaqstan BUU jumysyna azyq-túlik, sý, energetıka jáne ıadrolyq qaýipsizdik salalarynda jańa ıdeıalar men ustanymdar engizýge nıetti.
E.Ydyrysovtyń BUU BA jalpy debattaryndaǵy sóıleıtin sózi 28 qyrkúıekke josparlanǵan. Sonymen qatar, BUU basshylyǵymen jáne sheteldik áriptesterimen birqatar ekijaqty kezdesýler ótkizedi dep kútilýde.
