Brıfıngte Almaty qalasy bilim basqarma basshysy Lázzat Jylqybaeva Memleket basshysynyń zamanaýı qashyqtyq tehnologııalaryn údemeli engizý qajettigin, bilim beretin baǵdarlamalardyń mazmunyn qaıta qaraý qajettigin atap ótip, bilim berý júıesin odan ary jetildirý boıynsha birqatar mańyzdy tapsyrma bergenin alǵa tarta otyryp, birqatar málimet pen sheshimdi jarııa etti.
– Engizilgen karantın rejımi barlyq bilim berý mekemeleriniń jumysyna aıtarlyqtaı tolyqtyrýlar (ózgerister) engizdi, alaıda biz úshin óskeleń urpaqtyń densaýlyǵy men qaýipsizdigi únemi basty nazarda.
25 mamyr kúni 2019-2020 oqý jyly resmı túrde aıaqtalady jáne sol sebepti sizderdi Almaty qalasynyń bilim berý júıesinde qazirgi jaǵdaıdaǵy mańyzdy máselelerdi sheshýde qandaı jumystar júrgizilip jatqanynan habardar etkim keledi, – Lázzat Jylqybaeva.
Qalalyq bilim basqarmasy basshysy Almaty qalasy ákimdiginiń qoldaýymen 6 sáýirden qazirge deıin 276 myńnan astam oqýshy men 66 myńnan astam kolledj stýdenti úshin jańa qashyqtan oqytý formatynda oqý uıymdastyrylǵanyn jetkizdi.
Jergilikti bıýdjetten qarjylandyrý men demeýshilerdiń arqasynda qalanyń barlyq oqýshylary men 18 myń muǵalim kompıýterlermen jáne ınternet jelisimen der kezinde qamtamasyz etilgen.
Jaǵdaıda kúndelikti baqylaý júrgizý úshin oqýshylar, ata-analar men muǵalimderge keńes berý úshin 30-dan astam call-ortalyqtar ashyldy. Qashyqtan oqytý bastalǵannan beri call-ortalyqtarǵa 2,5 myńnan astam adam júgingen.
Nátıjesinde qashyqtan oqytý formatynda oqý prosesi oıdaǵydaı júıege keltirilip, búginde aǵymdaǵy josparǵa sáıkes júzege asyrylýda.
