Qazaqstan balalaryn AQSh azamattarynyń asyrap alý máselesin talqylaý úshin AQSh Memlekettik departamentiniń balalar máseleleri jónindegi arnaıy keńesshi Sıýzen Djeıkobs elimizge arnaıy keldi.
Dıplomat Bilim jáne ǵylym mınıstirligi balalar quqyǵyn qorǵaý komıteti, Syrtqy ister mınıstirligi jáne Adam quqyqtary jónindegi bıýronyń ókilderimen kezdesti.
Sıýzen Djeıkobs suhbatynda Qazaqstan men AQSh bala asyrap alý jóninde ortaq jumys tobyn quratyndyǵyn málim etti. Birinshi kezdesý bıyl qarashada Vashıngtonda ótedi. AQSh-ta qarasha ulttyq bala asyrap alý aıy bolyp belgilengen.
Sıýzen Djeıkobs bul kezdesýden keıin qazaqstandyq balalardy AQSh azamattarynyń asyrap alýy qaıta jandanady degen úmitte. AQSh azamattary ótken jyly shetelden 9 myńdaı jetim balany asyrap alǵan.
Al Qazaqstannan asyrap alǵan balanyń jalpy sany qazir 6600-ge jetken.
«Bala asyrap alǵan otbasylarda ókinishti jaǵdaılardyń aldyn alý úshin AQSh-ta ózimizdiń jumys tobyn qurdyq. Balalardyń quqyǵyn qorǵaý jónindegi úkimettik qyzmetter men agenttikterimen birge jumys jasaımyz. Kelesi aptada alǵashqy kezdesýimiz ótedi. Onda balalardy qorǵaıtyn jańa zań nemese zańǵa tolyqtyrýlar engizý máselesin talqylaımyz. Keıbir ata-analarǵa bizdiń kómek qajet», - deıdi Sıýzen Djeıkobs.
Murat Aıtqoja.
