Bıyl zaýyttardyń múmkindigin odan ári arttyryp, daıyn ónim kólemin 58 000 tonnaǵa deıin jetkizý josparda tur. Qant óndirisine qajetti tátti túbir egistiginiń kólemi de kóbeıip, 16 100 gektardy qurady.
Qazir zaýyttardy jańa jumys maýsymyna daıyndaý júrip jatyr. Máselen, Kóksý qant zaýytyndaǵy jańǵyrtý jumysy 20-sáýirde bastalypty. О́ndiristiń 8 sehynda 170 adam óńdeý jelisiniń negizgi toraptaryna aǵymdaǵy jóndeý men qalpyna keltirý jumystaryna qyzý kirisken eken. Barlyq sharýa qyrkúıek aıyna deıin tolyqtaı tııanaqtalyp, zaýyt bıylǵy tátti túbir ónimin qabyldaýǵa saqadaı-saı bolmaqshy.
- Jalpy qant qyzylshasyn qabyldaý pýnktteri men zaýyttyń ishki jóndeý jumysy 15 qyrkúıekke deıin aıaqtalýy tıis. Ol úshin qarjylyq múmkindikter de, eńbek resýrstary da jetkilikti. Qazir 170 adam jumyspen qamtyldy. Olar óndiristik toraptardy aǵymdaǵy jóndeýden ótkizedi. Sol sııaqty osy maýsymda zaýyt qamystan qant óńdeıtin jańa jeliniń qurylysyn aıaqtap, iske qospaq, - deıdi Kóksý qant zaýytynyń dırektory Altynbek Abatov.
Aıtpaqshy, ótken jyly osy Kóksý qant zaýytyn 260 000 tonna shıkizat óńdep, 32 myń tonna qant alǵan. Al bıyl óńdeıtin qyzylsha kólemin 285 myń tonnaǵa deıin arttyryp, taza qant óndirisin 38 myń tonnaǵa jetkizýdi maqsat etip otyr.
