Aımaqtar • 22 Mamyr, 2020

Qyzylordalyq oqýshy halyqaralyq bilim dodasynyń jeńimpazy atandy

46 ret kórsetildi

XIV Halyqaralyq «Matematıka jáne jobalaý» baıqaýynyń qorytyndysy boıynsha Qyzylorda qalasyndaǵy Nazarbaev Zııatkerlik mektebiniń 11-synyp oqýshysy Tomırıs Jumaǵalıeva birinshi oryndy ıelendi.

Bilim báıgesinde Tomırıs «Tabıǵattaǵy jáne qoǵamdaǵy naqty prosesterdiń matematıkalyq modelderi» seksııasyna qatysyp, «Kúrdeli epısıkloıdtardyń, gıposıkloıdtardyń jáne traktrısalardyń matematıkalyq modelin ázirleý» jobasyn usynǵan.

– Aınalamyzdaǵy zattarǵa muqııat qaraıtyn bolsaq, olardyń barlyǵyn túzý syzyqtar arqyly beıneleý múmkin emestigin baıqaýǵa bolady. Kóptegen zattar qısyq syzyqtardyń kúrdeli elementteri bar keskinderden quralǵan. Kúrdeli epısıkloıdtardy, gıposıkloıdtardy jáne traktrısalardy zertteý arqyly biz Geogebra matematıkalyq baǵdarlamasynda qısyqtardyń anımasııalary men olardyń teńdeýlerin shyǵardyq, – deıdi Tomırıs.

Bul matematıkalyq modelderdi zymyran qurastyrý, robotototehnıka, sáýlet-qurylys, optıka jáne taǵy basqa salalardaǵy ónimderdiń kúrdeli pishinderin jasaý úshin qoldanýǵa bolady.

Tomırıstiń bul jumysy halyqaralyq baıqaýda qazylar alqasy tarapynan joǵary baǵalanyp, birinshi oryn ıelendi. Jalpy elimiz boıynsha Nazarbaev Zııatkerlik mektepteri komandasy 4 altyn, 3 kúmis jáne 8 qola medal ıelendi.

Aıta ketý kerek, matematıka jáne ınformatıka pánderi boıynsha halyqaralyq bilim saıysy jyl saıyn daryndy balalarmen jumys isteıtin muǵalimder qaýymdastyǵynyń bastamasymen Máskeý qalasynda ótkiziledi. Bıylǵy baıqaý uıymdastyrýshylardyń sheshimimen onlaın formatta júrgizildi.

Sońǵy jańalyqtar

Bıatlonshylar Antholske attandy

Sport • Búgin, 02:01

SQO «qyzyl aımaqqa» endi

Aımaqtar • Keshe

Uqsas jańalyqtar