«Kásiporynnyń óndiristik jumystary qalypty rejımde jalǵastyrylyp jatyr. Ásirese, óndiristik qyzmet úshin mańyzy zor «Keleshek keńeıý», «Uńǵyma erneýiniń qysymyn basqarý» sekildi jobalardy qaýipsiz túrde iske asyrý sharalary júzege asyrylýda», - dedi búgin «Teńizshevroıl» JShS úkimetpen jáne jurtshylyqpen baılanys bóliminiń bas menedjeri Rzabek Artyǵalıev.
Onyń málimdeýinshe, osy kezge deıin atalǵan eki jobanyń qurylysy 77 prosentke oryndalyp otyr.
«Modýlderdi jasaý jáne olardy óndiris ornynan shyǵarý jumystary kestege sáıkes júrgizilip jatyr. Teńiz kenishinde modýlderdi qurastyrý jalǵasa beredi. Biz óndiriske tikeleı qatysy joq qyzmetkerlerdi ýaqytsha bosatyp, kenishten shyǵarǵanymyzǵa qaramastan, mańyzdy joba aıasyndaǵy jumystardy ary qaraı iske asyrýdamyz. О́ndiristik qyzmetti úzdiksiz qamtamasyz etý úshin óz qyzmetkerlerimizdi qorǵaýǵa arnalǵan birqatar qosymsha sharalardy engizdik. Teńizdegi qyzmetkerlerdi ýaqytsha jumystan bosatý nátıjesinde ózge qyzmetkerlerdiń densaýlyǵyna zııan keltirmeý kózdelýde», - dedi ol.
О́ndiristik qyzmetti úzdiksiz qamtamasyz etýge baǵyttalǵan qorǵanys sharalarynyń biri – jumys isteıtin qyzmetkerlerdi jeke toptarǵa bólý. Bul operatıvti jumys toby músheleriniń biri vırýs juqtyrǵan jaǵdaıda, basqa jumys toby olardyń ornyn almastyrýǵa daıyn bolady. Osylaısha, óndiristik qyzmetti úzdiksiz qamtamasyz etýdi jalǵastyrý toqtamaıdy.
– Jumys isteý úshin beriletin ruqsatty onlaın tirkeý arnaıy baǵdarlama men mobıldi qurylǵylar arqyly júzege asyrylýda. Biz ortalyqtan basqarý pýltterin shektedik. Bólmege tek operatorlar ǵana kire alady. Sonymen qatar, bólmelerdi dezınfeksııalaýdyń qatań erejeleri engizildi, - dedi R.Artyǵalıev.
