Kóktemgi dala jumystarynyń barysy týraly oblystyq aýyl sharýashylyǵy basqarmasynyń basshysy Saǵynjan Apaqashov apparat jıynynda baıandady.
– Búgingi kúni 730,4 myń gektar alqapqa dándi daqyldar sińirildi. Kartop 9630 ga jerge otyrǵyzyldy. Kókónis tuqymy 1221 ga alqapqa egildi. Iri aýyl sharýashylyq taýar óndirýshileri negizinen kóktemgi dala jumystaryn aıaqtady, – dep málimdedi ol.
Sondaı-aq Saǵynjan Apaqashov bıyl dıqandar mıneraldy tyńaıtqyshtar satyp alýdy ulǵaıtyp, kelisim-shart boıynsha jetkizý jumystary júrgizilý ústinde ekenin habarlady. Kásiporyndarǵa sýbsıdııa tóleý bastalǵan. Surypty jańartý úshin aýyl sharýashylyǵy óndirýshileri 8 700 tonnadan astam joǵary ónimdi dándi daqyldardyń, 4 300 tonnadan astam elıtalyq kartoptyń tuqymdaryn satyp aldy.
Bıylǵy jyldyń kóktemgi dala jumystaryna 128 sharýashylyq «QazAgro» kompanııasy arqyly 4 mlrd teńge mólsherinde nesıe aldy. Qarjylandyrý «Keń dala», «Qarapaıym zattar ekonomıkasy» jáne basqa da baǵdarlamalar boıynsha júzege asyrylǵan.
Sonymen qatar Saǵynjan Apaqashov 2020 jylǵa arnalyp jalpy somasy 2,8 mlrd teńge bolatyn sýbsıdııa túrindegi memlekettik qoldaý qarastyrylǵanyn habarlady.
