– Prezıdenttik kadrlyq rezervine qatysýǵa ne túrtki boldy? Irikteý qalaı ótti?
– Prezıdenttiń kadrlyq rezervi jastar úshin áleýmettik lıft, óz salasynda jetistikke jetý múmkindigi dep bilemin. Menińshe, qazirgi júıede bıýrokratııanyń ushqyny áli de baıqalady. Sheshim qabyldaýda tyń kózqarastyń jetispeıtini de kózge uryp turady. Jastar jańa lep, ózgeris alyp keledi dep senemin. Bul jastardyń mindeti de. Jobaǵa qatysý – belsendi azamattyq pozısııanyń aıqyn kórinisi. Iаǵnı qatysýshylar – memleket taǵdyryna nemquraıdy qaramaıtyn azamattar.
Qashanda Otanyma qyzmet etsem dep oılaıtynmyn. Elime paıda tıgizsem degen maqsatym boldy. Sondyqtan osy joba arqyly izgi nıetime jetsem ári baǵymdy synasam degen sheshimge keldim.
Irikteý formaty men úshin tyń tájirıbe boldy. Ýaqyt shekteýi de qosymsha jaýapkershilik mindetteıdi eken. Esepti qaı kezde de jaqsy kóretinmin. Birinshi kezeńnen ótkennen keıin qyzyǵýshylyǵym arta tústi. Jobany tanystyrý, suhbattar da jaqsy tájirıbe boldy. Jobada jeke qasıetterimizben qatar topta jumys isteı bilýimiz de synaqtan ótti. Bul da mańyzdy talaptardyń biri dep bilemin. О́ıtkeni memlekettik qyzmet – birlesken jumys. Úmitkerden kóshbasshylyq, analıtıkalyq oılaý, ornyqty sheshim qabyldaı bilý sııaqty qasıetter talap etiledi. Ár kezeńi jańa asý bolyp, qyzyǵýshylyǵym artyp, bar yntamdy saldym.
– Qazir elimizdiń avıasııa salasyna jaýapty úlken kompanııada qyzmet jasaısyz. Oǵan deıin qandaı qurylymdarda eńbek ettińiz?
– Men 12 jyl boıy azamattyq avıasııa salasynda qyzmet etip kelemin. Jaı maman bolyp esigin ashqan qurylymnyń basshylyq qyzmetine deıin óstim, mamandyq tańdaýda jolym boldy dep esepteımin. Mamandyqqa adaldyq pen qyzyǵýshylyq meni AQSh-ta bilim alýǵa jeteledi. San-Dıegodaǵy ýnıversıtette bilimimdi tolyqtyryp, tyń ıdeıalarmen elge oraldym. Jańa qyzmetime deıin «Kazaeronavıgasııa» kompanııasynda ǵylymı-tehnıkalyq aqparat bóliminiń jetekshisi bolyp qyzmet atqardym. Odan keıin strategııalyq josparlaý bólimi basshysynyń orynbasary laýazymyna taǵaıyndaldym.
– Bul kadrlyq rezervke ótkennen keıin qandaı usynys boldy?
– Birneshe usynys tústi. Aımaqtarǵa bilim basqarmalaryna jumys isteýge shaqyrdy. Men bas tarttym, óıtkeni atalǵan salada esh tájirıbem joq. О́zim biletin salada qyzmet etip, bilgenimmen bólisken durys degen oıdamyn.
– Olaı bolsa, qazirgi jumysyńyz týraly aıtyp berseńiz.
– Qańtardan bastap Azamattyq avıasııa komıteti tóraǵasynyń orynbasary laýazymyn atqaramyn. Ujymmen burynnan tanyspyn, óıtkeni alǵashqy eńbek jolym osy qurylymda bastalǵan edi. Men áýejaılar, aeronavıgasııa, avıasııalyq qaýipsizdik, tarıfterdi retteý men baqylaý máselelerine jaýaptymyn. Jalpy, meniń oıymsha, memlekettik qyzmettiń qyzyǵy kóp. О́ıtkeni jeke sektorlarǵa qaraǵanda mindetteri de zor. Qazir áýe kólikteriniń ınfraqurylymyn damytý, «Nurly jol», «100 naqty qadam» memlekettik baǵdarlamalarynyń iske asyrylýyn qadaǵalaımyn. Shıratyp aıtar bolsam, «100 naqty qadam» Ult josparyndaǵy 68-qadamnyń, ıaǵnı áýe tasymalyn memlekettik retteý tıimdiligin arttyrý, brıtandyq modeldi engizýdiń joldaryn qarastyryp jatyrmyn. Qurylymdyq jumystarǵa kirisip kettik, avıasııalyq ákimshilik quryldy. Zańǵa ózgeris engizip, halyqaralyq standarttarǵa saı jumys isteý jolǵa qoıylǵan. Osy oraıda Brıtanııanyń avıasııalyq agenttigi kelisim negizinde tehnıkalyq kómek kórsetýde.
Jaqynda Almaty qalasynda úlken hab qurylyp, sheteldik kompanııalarmen kelisim jasaldy. Endi Almaty halyqaralyq áýejaıynda jańa termınal salý josparlanýda. Almaty áýejaıyn úlken hab retinde qalyptastyrýdy oıǵa alyp otyrmyz.
Ashyq aspan saıasaty boıynsha basqa eldiń kompanııalaryna Qazaqstan áýe keńistiginde ushý múmkin boldy. Oǵan qosa О́skemendegi áýejaı retke keltirilip, Túrkistan qalasynda áýejaı qurylysy bastaldy. Qosymsha ınvestısııa tartylyp, Shymkent qalasyndaǵy áýejaıǵa jańa termınal salynyp jatyr.
Infraqurylymdy damytý maqsatynda 2023 jylǵa deıin elimizde 13 aerodromdy iske qosý josparlanyp otyr. Shalqar, Qulsary, Mııaly, Ulytaý, Arqalyq, Zaısan, Úsharal sııaqty aýdandarda aerodromdar salý arqyly elimizdiń avıasııa salasyn jandandyra túspekpiz. Álbette, jospar kóp, maqsatymyz aıqyn. Degenmen tórtkúl dúnıeni sharpyǵan koronavırýs ınfeksııasy saldarynan bizdiń de sala turalap tur. Azamattyq avıasııanyń da zardap shekkeni anyq. Halyqaralyq áýe qatynasynyń kólemi 98 paıyzǵa qysqardy, ishki reıster túgeldeı toqtatyldy. Mamyr aıynda ishki reıster ashylyp, jumystar rettele bastady.
Tótenshe jaǵdaı kezinde áýejaılarǵa da jeńildikter jasaldy. Máselen, olar jarty jylǵa salyqtan bosatylyp, áýe kompanııalary da belgili bir salyqtar tólemeýge múmkindik aldy.
–Kadrlyq rezervke ótkendermen pikir almasyp, jańalyqtaryńyzben bólisip, talqylap otyrasyzdar ma?
– Álbette! Bárimiz dos bolyp kettik. О́z qyzmetimiz týraly aıtyp, bir-birimizden keńes surap turamyz. Kadrlyq rezervke ótken zamandastarmen jaqsy qarym-qatynastamyz. Dos bolyp kettik desek artyq aıtpaǵan bolamyn. Bul jobanyń arqasynda jańalyqqa jaqyn, tyń ıdeıalarǵa toly, jarqyn bolashaqqa senimi mol azamattarmen tanystym.
Jalpy, jobaǵa qatysý búgingi tirshiligime qaıta qaraýǵa, saralaýǵa múmkindik berdi. Jumysyma baǵa berip, ózimniń álsiz ne myqty tusymdy anyqtaı aldym. Kemshiligimdi túzep, oıyma oı qosqandaı boldym. Jańa maqsattarymdy aıqyndap, oǵan jetýdiń jolyn tapqandaı boldym.
Áńgimelesken
Svetlana ǴALYMJANQYZY
«Egemen Qazaqstan»
