Kitaptyń alǵy sózin jazǵan Qazaqstan halqy Assambleıasy tóraǵasynyń orynbasary Janseıit Túımebaev qazaq pen uıǵyr halqy arasyndaǵy dostyq qarym-qatynastardy baıandaı kele, uıǵyr jazýshylary Zııa Samedı, Hızmet Abdýllın men týyndy avtory Ahmetjan Ashırıdiń shyǵarmashylyǵy jóninde sóz qozǵaıdy. Uıǵyr ádebıetiniń ókilderi Qazaqtannyń birlik pen yntymaǵyn saqtap, túrkitildes elderdiń mádenıet jáne óner salasyndaǵy baılanystaryn nyǵaıtý jolynda sińirgen eńbekterin atap ótedi. Sondaı-aq kitaptyń jaryq kórýine demeýshilik jasaǵan Qazaqstan halqy Assambleıasynyń beldi múshesi, qoǵam qaıratkeri Ahmetjan Shardınovqa, Ázerbaıjandaǵy Dúnıejúzilik jas túrik jazýshylary odaǵynyń tóraǵasy Akbar Qoshalyǵa rızashylyq bildiredi.
Al Bakýde turatyn ónertanýshy-ǵalym Sánýbár Hadjıeva-Ilııasly kitaptyń súıinshi danasyn oqyp shyǵyp, «Idıkýt» – ázerbaıjan tiline aýdarylǵan eń alǵashqy uıǵyr romany» deı kele, shyǵarma ózegine túsinikteme beredi.
«840 jyly Orhondaǵy uıǵyr memleketi ydyraıdy. О́ge Tekın biraz ýaqyttan keıin memleketti qaıta qalpyna keltiredi. Alaıda qytaılar shabýyl jasap, sol kezde bılikte bolǵan sońǵy han II Kasardyń aǵasynyń uly Pan Tekınniń jáne bas ýázir Sarchýktyń basshylyǵymen 15 uıǵyr taıpasy Tıan-Shan taýynyń shyǵysyna qaraı betteıdi. Munda olar eki bólikke bólinedi. Olardyń bir bóligi – Pan Tekınniń basshylyǵymen soltústik-shyǵysqa ótip, 5 aýdannan turatyn Besbalyq qalasyn salady. Ýaqyt óte kele qala gúldenedi. Bul jerdiń bıleýshileri «Idıkýt» dep atalǵan.
Kitapty qyzyqty etetin taǵy da bir áserli jaıt, sol kezdegi tarıhı kóriniske negizdelgen aqparat kóp kezdesedi. Týyndyny oqı otyryp, uıǵyrlardyń tarıhymen qosa, mońǵoldardyń da tarıhyna, mádenıetine, kıim kııý dástúrine, nanym senimderine jáne basqa naqty derekterge kýá bolamyz. Sondyqtan tarıhı shyndyqqa negizdelgen «Idıkýt» romany Ázerbaıjan memleketinde de óz oqyrmanyn tabady dep senemiz»,
deıdi.
Jınaqtyń tanystyrylymy aldaǵy ýaqytta Bakýde jáne Almaty qalasynda júzege asady.
