Osy rette komıtet tóraǵasy Qazaqstandaǵy shegirtkege qarsy qabyldanǵan sharalar jóninde tizbektedi. Respýblıkalyq fıtosanıtarlyq dıagnostıka jáne boljamdar ádistemelik ortalyǵynyń boljamyna sáıkes, bıyl 554 myń gektar alqapqa úıirli shegirtkeler, sonyń ishinde ıtalııandyq prýs 95 myń gektarǵa, azııalyq shegirtke 164 myń gektarǵa jáne marokkolyq shegirtke 93 myń gektarǵa taralýy múmkin.
Budan basqa, saıaq shegirtkeniń taralýy aýqymy 266 myń gektardy quraýy yqtımal. Bul oraıda zııankestermen kúreske respýblıkalyq bıýdjetten 1 mlrd teńge bólindi. Atalǵan qarajatqa hımııalyq óńdeý men pestısıdter satyp alynǵan.
«Saıaq shegirtkege qarsy kúreske jergilikti bıýdjetterden 555 mln teńge qarastyrylyp otyr. Sonymen qatar ortalyq qoımada shegirtkemen kúresý úshin jalpy 525 myń gektar alańǵa 47 myń lıtr kóleminde pestısıd qory bar. Úıirli shegirtkege qarsy óńdeýdi tıimdi júrgizý maqsatynda pestısıdterdiń alýan túrleri alyndy.
Tutastaı óńdeý jumystaryna arnaıy 148 búrikkish tehnıka jumyldyrylmaq. Mınıstrlik oblys ákimdikterimen birlesip, óńirlik ákimder basqaratyn aımaqtarda jedel shtabtar quryldy. Sondaı-aq hımııalyq óńdeý jumystary boıynsha monıtorıngtik jospar bekitildi.
Shegirtkelerdiń oshaqtaryn anyqtaý úshin 571 avtokólik, GPS trekerleri, planshetter paıdalanylady. 1200 tekserýshi tartylyp, 38 mln gektar zertteledi dep kózdelýde. Kórshiles eldermen, atap aıtqanda QHR, Reseı Federasııasy jáne О́zbekstan memleketimen shekaralas aýmaqtarda zııankesterdiń oshaǵyn anyqtaý úshin birlesken zertteýler júrgiziledi», - dedi A.Mars.
Spıkerdiń aıtýynsha, qazir marokkolyq shegirtkege qarsy hımııalyq óńdeý jumystary Jambyl jáne Túrkistan oblystarynda aıaqtalýǵa jaqyn. 28 mamyrdaǵy jaǵdaıǵa sáıkes, óńdelgen aýmaqtyń kólemi 66 myń gektar nemese boljamnyń 71%-yn qurap otyr. Al Almaty, Qaraǵandy jáne Pavlodar oblystarynda ıtalııandyq prýsqa qarsy jumystar bastaldy. Búginde atalǵan aımaqtarda óńdelgen jerdiń kólemi 12 myń gektarǵa nemese boljamnyń 4%-na jetken.
