Memlekettik qyzmet pen sybaılas jemqorlyqqa qarsy is-qımyl týraly zańnama talaptarynyń saqtalýy jáne artyq jumys isteý faktilerin boldyrmaý baǵytynda atqarylǵan jumystar týraly esepten keıin keńes músheleri birqatar kemshilikterdi atap ótti.
Osy jyldyń aqpan aıynda Prezıdent ákimshiliginiń, Premer-Mınıstr Keńsesiniń jáne QR Memlekettik qyzmet isteri agenttiginiń tapsyrmasyna sáıkes aımaǵymyzda artyq jumys isteý faktilerin joıý maqsatynda monıtorıngtik toptar qurylǵan. Olar qoǵam ókilderimen birlesip aımaqtaǵy 40-tan astam memlekettik organda reıd jumystaryn júrgizedi. Alaıda, oblystyq memlekettik kirister departamentinde monıtorıngtik top jumysyna kedergi keltirilgen.
Osy maqsatta qurylǵan monıtorıngtik top Jańaqorǵan aýdanyndaǵy memlekettik organdarda reıd júrgizý barysynda aýdandyq memlekettik kirister basqarmasynda ústeme jumys isteý faktilerin anyqtaǵan.
Memlekettik kirister departamentinde memlekettik qyzmetshilerge tártiptik jaza qoldaný tártibi saqtalmaǵan. Tipti eńbek demalysyndaǵy qyzmetkerge de negizsiz tártiptik jaza qoldanylǵan. Al, qalalyq memlekettik kirister basqarmasynda bos memlekettik ákimshilik laýazymǵa konkýrs ótkizýde kemshilikter jiberilgen. Atalǵan zańbuzýshylyq boıynsha, konkýrstyq komıssııanyń 5 múshesine QR ÁQBtK-niń 99-babynyń 1-bóligimen ákimshilik hattamalar toltyrylyp, ákimshilik aıyppuldar salyndy, - QR Memlekettik qyzmet isteri agenttiginiń Qyzylorda oblysyndaǵy Ádep jónindegi keńesiniń tóraǵasy Nurman Talqanbaev.
Ádep jónindegi keńes músheleri kún tártibine qoıylǵan máseleni jan-jaqty qarap, oblystyq memlekettik kirister departamenti basshysyna ózi basqaratyn mekemede quqyq buzýshylyqtardyń, artyq jumys isteý faktileriniń oryn alý sebepterine taldaý jasap, ujymda talqylaý júrgizýdi jáne atalǵan buzýshylyqtardy boldyrmaý baǵytynda tıisti sharalar qabyldaýdy usyndy.
Memlekettik kirister departamentiniń Ádep jónindegi ýákiline artyq jumys isteý, qyzmettik avtokólikti qyzmetten tys maqsatta paıdalaný jáne zańsyz syılyq alý, qoǵamdyq oryndarda moraldyq-etıkalyq normalardy buzý sekildi quqyqbuzýshylyqtarǵa turaqty túrde profılaktıkalyq baqylaý sharalaryn júrgizý tapsyryldy. Artyq jumys isteý faktilerine jol bergeni úshin Qyzylorda qalalyq jáne Jańaqorǵan aýdandyq memlekettik kirister basqarmalary basshylarynyń tártiptik jaýapkershiligin qaraýdy usyný biraýyzdan maquldandy.
