Aımaqtar • 01 Maýsym, 2020

Elimizde balalarǵa arnalǵan depozıt iske qosyldy (vıdeo)

Halyqaralyq balalardy qorǵaý kúnine oraı, Turǵyn úı qurylys jınaq banki («Báıterek» holdınginiń enshiles uıymy) jaǵymdy jańalyǵymen bólisip otyr. Bank jańa ónim túri - «Arnaý» balalar depozıtin iske qosty. Endi barsha qazaqstandyqtar páterlerin nesıege jyldyq 2% mólsherlememen satyp alý múmkindigine ıe bolady. Ol úshin qarajatty balalyq shaqtan bastap jınaqtaı bastaǵan jón.

Aınash ESALY

«Arnaý» depozıtiniń eń tómengi jınaqtaý merzimi 10 jyldy quraıdy. Osy ýaqyt ishinde salymshy óz shotynda bolashaq páter baǵasynyń 50%-yn jınaýy qajet. Onyń jınaǵan qarajatyna jyl saıyn jyldyq 2% mólsherinde bank syıaqysy men 20% kóleminde memleket syılyqaqysy túsedi (200 AEK-ten aspaıtyn somaǵa eseptelinedi). Osynyń esebinen, depozıttiń kiristiligi bir jyl ishinde jyldyq 6%-ǵa deıin jetedi.

Eń az jınaqtaý merzimi ótkennen keıin, «Arnaý» depozıtiniń ıesi jyldyq mólsherlemesi 2%-dy quraıtyn turǵyn úı zaemyn ala alady. Zaem tek kámelet jasyna jetken, ıaǵnı, 18-ge tolǵan jáne odan asqan balalardyń atyna rásimdeledi.

– Turǵyn úı qurylys jınaq bankinde buǵan deıin de sábı dúnıege kelisimen onyń bolashaq úıine aqsha jınaý úshin shot ashýǵa bolatyn. Búginde bankte dál osyndaı 140,8 myńnan astam shot bar. Endi, mine, klıentterimizge tıimdirek bolý úshin, biz balalar depozıtin bólek bir ónim retinde usynýdy jón kórdik. «Arnaý» depozıti boıynsha beriletin nesıe mólsherlemesi 2%-ǵa deıin tómendetilgen. Bul depozıt ıeleri úshin – qajetti qarajatty jınaqtap, jas kezden-aq baspanaly bolýdyń tamasha múmkindigi. Dál osyndaı 2 paıyzdyq tómengi mólsherlememen búginde tek «Baqytty otbasy» baǵdarlamasy aıasynda ǵana nesıe beriledi. Alaıda, oǵan barlyq azamattar qatysa almaıdy. Al «Arnaý» depozıti bolsa, barsha qazaqstandyqtar úshin qoljetimdi. Balalar tez ósedi. Olardyń shotyna qazirden bastap aqsha sala bastasaq, keminde 10 jyldan keıin bastapqy jarnany da jınap qoıýǵa bolady. Al bala eseıgen kezde, tabysy kóp bolmasa da, eń tómengi mólsherlememen páter satyp ala alady, – dep atap ótti Turǵyn úı qurylys jınaq bankiniń Basqarma tóraıymy Lázzat Ibragımova.

Turǵyn úı qurylys jınaq bankiniń depozıtinde qarajatty josparly túrde jınaǵan barlyq salymshylar men «Arnaý» depozıtiniń ıeleri jeńildetilgen prosedýra boıynsha ózderiniń tólemqabilettilikterin rastaı alady. Bul eńbek jolyn jańa bastaǵan jastar úshin asa mańyzdy.

«Arnaý» depozıtin sábıdiń atyna tek balanyń zańdy ókilderi (ata-anasy, qamqorshysy) ǵana asha alady. Al oǵan qarajatty balanyń ata-anasy men qamqorshysynan bólek, onyń ájesi, atasy, aǵalary men ápkeleri, tipti, uıymdarda tolyqtyra alady. Buǵan qosa, «Arnaý» depozıtin tabystaýǵa nemese ony basqa depozıttermen qosýǵa, sonymen qatar, oǵan ózge tarıftik baǵdarlamalardan aýysýǵa bolmaıdy.