Tutastaı alǵanda, aýyl sharýashylyǵynyń jalpy ónim kólemi byltyr 0,9%-ǵa artyp, 5,2 trln teńgeni quraǵan. Eńbek ónimdiligi bir jumyskerge shaqqanda – 2,4 mln teńge. Bul tartylǵan ınvestısııanyń zaıa ketpegenin ańǵartatyndaı.
– 2019 jyly aýyspaly egisti saqtaı otyryp, rentabeldiligi joǵary daqyldar alańyn ulǵaıtý maqsatynda maıly jáne burshaqty daqyldar alqaby ulǵaıdy. Shamamen 470 myń tonna mıneraldy tyńaıtqysh sebildi. Alaıda bul jetkiliksiz. Sondyqtan bıyl salada tyńaıtqyshty ǵylymı usynymdarǵa saı engizý úshin mıneraldy tyńaıtqyshtardy sýbsıdııalaý somasy 26 mlrd teńgege deıin kóbeıdi. Mashına-traktor parkin jańartý qarqyny 4%-ǵa deıin artty. 12 myńǵa jýyq tehnıka satyp alyndy, – dedi S.Omarov.
Onyń aıtýynsha, ósimdik qorǵaý quraldaryn sýbsıdııalaý keńeıtilip keledi. Endi gerbısıdter ǵana emes, pestısıdterdiń basqa da túrleri sýbsıdııalanady. Sýbsıdııalardy kúntizbelik jyl sheńberinde emes, tuqym, tyńaıtqysh, pestısıd satyp alǵan kúnnen bastap 12 aı ishinde alýǵa múmkindik jasaldy.
Jalpy, ótken jyly qazaqstandyq ónimder álemniń 72 eline eksporttaldy. Agroónerkásiptik keshen ónimderin eksporttaýǵa naqtyraq toqtalsaq, Qytaıǵa jiberilgen ónim kólemi 50,5%-ǵa ulǵaıdy. Parsy shyǵanaǵy elderine eksport – 3,2 ese ósti. Eksporttyń 7,4%-y Ortalyq Azııa elderine, 8,2%-y Eýrazııalyq ekonomıkalyq odaq elderine jiberilgen.
Baspasóz máslıhaty barysynda memlekettik qoldaýdyń nátıjesinde sút óńdeý kólemi 7%-ǵa, et óńdeý 8%-ǵa artqany aıtyldy. Bul rette sút zaýyttarynyń júktemesi 18%-ǵa, et kombınattarynyń júktemesi 21,6%-ǵa ulǵaıdy.
– Mal sharýashylyǵyn damytýǵa «QazAgro» byltyr 156,5 mlrd teńge baǵyttady. Quny 53 mlrd teńge bolatyn 82 myń bas iri qara, 12,3 mlrd teńgege 374 myń bas usaq mal satyp alý qarjylandyryldy. Sondaı-aq baǵasy 19,1 mlrd teńge bolatyn 16 jańa ınvestısııalyq joba júzege asty. Osylaısha, mal sharýashylyǵynda 64,3 mlrd teńgege 54 ınvestısııalyq joba engizildi. Bıyl taǵy da 178 myń iri qara men 250 myńnan astam usaq mal ákelý josparlanýda. Import almastyrý sheńberinde 46 myń tonna sút pen 30 myń tonna qus etin óndirý jobalaryn iske asyrý kózdelgen, – dedi S.Omarov.
Osy jıynda aıtylǵandaı, búginde mınıstrlik eldiń epızootııalyq jáne fıtosanıtarııalyq salamattylyǵyn qamtamasyz etý jáne qazaqstandyq aýyl sharýashylyǵy ónimderin ótkizetin eksporttyq naryqtar ashý boıynsha júıeli jumys júrgizýde. Koronavırýs pandemııasy saldarynan oryn alǵan daǵdarysqa qaramastan, aǵymdaǵy jyldyń 4 aıynyń qorytyndysy boıynsha agroónerkásiptik kesheni salasynda jaǵdaı turaqty.
