Eń aldymen E.Birtanov koronavırýs ınfeksııasy boıynsha aǵymdaǵy jaǵdaıǵa toqtaldy. «Búgingi kúni elimizde koronavıýrs ınfeksııasyn 12124 adam juqtyrdy. Olaryń 77%-y – sımptomsyz naýqastar. Soǵan qaramastan barlyq tirkelgen azamattarǵa tolyq medısınalyq dıagnostıkalyq kómek memleket tarapynan tegin beriledi. Em halyqaralyq áriptestermen aqyldasqan ǵylymı jumystarǵa negizdelgen klınıkalyq protokol arqyly júrgiziledi. Bul protokoldy elimizdiń eń belgili ǵalymdary ázirlep, bekitken. Epıdemııa bastalǵannan beri 8 redaksııadan ótti. Sol em-domnyń nátıjesinde 52% (6288) naýqas jazylyp shyqty. Al 5836 pasıent baqylaýda», dedi ol.
Elimizdiń bas dárigeri jaqynda ǵylymı zertteý jumystarynyń negizinde elimizde koronavırýsqa qarsy sharalardyń taktıkasy ózgergenin jetkizdi. «Jańa taktıka halyqaralyq standarttarǵa da saı keledi. Ol – sımptomsyz naýqastardy aýrýhanalarǵa jatqyzbaı, úı karantınine alý. Olar jergilikti emhanalardaǵy ýchaskelik dárigerlerdiń baqylaýynda bolady. Qazirgi ýaqytqa deıin sondaı jeńil deńgeıdegi naýqastar ınfeksııalyq aýrýhanalarda jatyr. Osy aptadan bastap osy protokoldy engizdik. Qazir stasıonarda jatqan 5836 naýqastyń 59-ynyń (1%) háli nashar. 600-deı (10%) pasıenttiń jaǵdaıy ortasha deńgeıde. Taǵy 10%-ynyń aýrýy jeńil bolsa, 78%-y (4500 adam) – sımptomsyz», dedi E.Birtanov.
Keıbir osyndaı aýrý belgileri esh baıqalmaǵan naýqastardyń aýrýhanaǵa jatýdan bas tartyp jatqanyn aıtqan mınıstr: «Muny durys túsiný kerek. Ol ınfeksııany basqalarǵa juqtyrýy múmkin. Sondyqtan olardyń aýrýhanada nemese úıde óz-ózin oqshaýlaýy óte mańyzdy», dedi.
